Jowai: Ka Society for Urban & Rural Empowerment (SURE), Jowai da pynman yalang ko ha ka chnong Moosakhia dei thmu wow pynsñiawthooh ya kiwa chong chnong khamtam ya ki khynnah chaphang ka Project thymme wa da dang yoh ki naka Foundation for Social Transformation (FST), Guwahati.
Ya kani ka yalang da pyllai da ka Field Coordinator ka SURE, ka Pasqualina Lamare wei da yoh leh ya ki ktien pdiang sñiawbha na u Waheh Chnong u Risa Paksang.
Kani ka project thymme toh ya ki khynnah khynroo wei u pynkrehkaam ya ka chisnem lynter ka wow yarap ya kiwa da dam skur chiteiñ por wei i thong toh wow pynchlur ya ki wow lai yoh hikai ki ha ki kaam wa ka-it ki wei daw yarap su ya ka bai psiah ki cha ki thaw wa e sikai ya ki da ka FST wei hadien wa dep ya ka e sikai ye ki u seiñ khih dei yong ki hi.
U Rev. H.H. Mohrmen da e yumut u wa ka rep ka riang toh emkaam wow pynchlur ya ki khynnah wow tip ki chaphang yong ka wei wow rep khlem pynemkaam ya ki sboh dawai wa chna da u bru yow neh i sboh ka khyndaw yow ye u pynemkaam ya ka boonsien. Da pynchlur u leh wow rep ya ki tit.
U Ritu Parna Neog uwa man kam u Program Associate ka FST da khana u chaphang i rukom krehkaam kani ka seiñ wei da ong u leh wa kawon kawon ka kaam haap sdang i deiwa khian hadien won daw ku cha ka kyrdan wa heh wei da chem u leh wa boonsieñ da wanrah ya kiwa boon ki project wa wanrah cha kiwa boon ki chnong tangwa kiwa chong chnong ym em chimkhia ki ya ki wei lada ym krehlang kiwa chong chnong waroh man ko kawa sepai.
Discussion about this post