U Montri Khynnah ka sorkar pyrdi, u Dr. Sanjeev Kumar Balyan, Ministry of Fisheries Animal Husbandry and Dairying da yachem u wa ki warep wa psan dakha ka East Khasi Hills District kiwa da yoh yarap hapoh ka PMMSY ha ka yalang wa da pynman ha Jiva Resort, Sohra ynnin ka sngi deiwa emlang ka Director of Fisheries, Meghalaya, ka A.L. Mawlong, MCS wa kiwi de ki sahep ka chnat Fisheries.
Da yalam yei pynkrehkaam ya ka Scheme ka sorkar pyrdi kawa tip kam ka Pradhan Mantri Matsya Sampada Yojana (PMMSY) heiwa ka Director ka Fisheries da khana ko wa da pyndep ko wow pynlait 75% ka poisa neibynta u snem 2021-22 wei daw paan sa ya ka poisa wa dang sah yow pynlait.
Da pyntip wa ha ka Meghalaya i em nan waroh dapoi 3500 Ha i heh wa pynkreh da 27,000 ngut kiwa psan dakha. Wei na kini ki nan da ye wow pynmih 18000 MT chi snem tangwa iwa emkaam toh 32000 MT.
Lyngba kini ki nan kiwa khut leh kam ki Grow Out Ponds yow ye u wanrah chiboon ki warep wow psan dkha da emkaam sa 4000 Ha wow em hapoh ka Aquaculture ka jylla yow pyndap ya iwa emkaam ka jylla.
Da wanrah leh hakhmat u Montri yeiwa ye ka jylla u man kam ka thaw wow yada ya ki dakha ha ki um ki wah wa pait da ki chnong ki thaw heiwa da em 79 tylli ki Fish Sanctuary hapoh ka jylla wei kini ki thaw da man ki leh kam ki thaw uiñke suwari wa ye u pynmih poisa ya kiwa chong chnong.
Neiliang kiwa psan dakha kiwa yohmyntoi ka East Khasi Hills da khana ki ya iwa da chem da maad ki hawa psan dakha wei kammon wow ye u pynku chooh chooh ya ini i kaam.
Uwi na kiwa psan dakha uwa da yoh myntoi na ka PMMSY uwa da yoh da ka thuk-thuk waka Ice Box, katni da sdang u wow lai booh dakha cha yung ki bru deiwa sdang ya ka Home Delivery Services ha ki thaaiñ Sohra Sub-Division.
Neiliang u Montri da pynchlur u wow pynku chooh chooh ya kani ka kaam psan dakha neibhah em ka laad wow man ko kawa heh yow pynim ja ya ki bru wei wow pyndap yeiwa emkaam ka jylla.
