Jowai: U Justice Mohammed Yaqoob Mir uwa man u Chief Justice ka High Court of Meghalaya ynne ka sngi da booh mooyurim yow chna ya ka yung bichaar wa pura namo ka District and Session Court Complex ha Khliehtyshi, West Jaintia Hills District, Jowai hei emlang u Justice Hamarsan Singh Thangkhiew.
U Chief Justice Mohammed hei klam yong oo da kyntu u ya waroh kiwa emkti wow chna u kreh hok ki wei wow pyndep ya i kreh iwa heipor yow ye i krehkaam ka yung bichaar u man iwa pliah wa i wym thut. Da phah u leh ya ki Judicial Officer waka Bar Association wow e lut ki 100% yow pyntikna wa ka yaleh mukotduma u man ko kawa khooid wa kawa pyndep smat kamjooh u yoh kiwa yaleh yei hok yong ki.
U District Session Judge u E. Kharumnuid ha ki ktien pdiang burom yong oo da pyntip u wa ka District and Session Judge Court toh kawa da sdang nadooh ka 27-07-2013 wei katni krehkaam ko na yung krehkaam u DC, Jowai wei ka yung krehkaam wa dang chna katni ha Khliehtyrshi em ko ha i thaw wa heh 11.162 Acres wei da pynkhreh ya i lut i sep da ka chnat PWD wei da yoh leh ya i mynjur wa ka poisa wow chna noh.
Ha kani ka sngi da em leh u Deputy Commissioners ka West wa East Jaintia Hills u C. P Gotmare, IAS wa u F.M. Dopth, IAS, Superintendent ki ar District u Lakador Syiem, IPS wa u Vivekananda Singh IPS, u Secretary ka DLSA u D.S. Marbaniang, ki Extra Assistant Commissioners ka D.D. Syngai, ka YR Mawlong, u B.J Kharshandi, u waheh chong ka Khliehtyshi, ki sahep ka PWD wa kiwi kiwi ki sahep.
Discussion about this post