U montri rangbah ka jylla, u Conrad Sangma ynne ka sngi da wan booh mooyurim u yow sdang noh u chna yaka Wahiajer Multi Sports Complex wa chongdor T. 25 klur kawa daw chna ha i thaw wa tip kam i Moorangtung iwa em pyn hajan ka Wahiajer Mini Stadium, Wahiajer.
Neiliang u MLA ka thaaiñ uwa man leh u montri ka chnat Transport, u Sniawbhalang Dhar da khana u wa i yaleh wow yoh ya kani ka thaw yalehke toh iwa da slem wei da dep e leh boon tylli ki dorkhat cha ka sorkar wei kani toh ka “Dream Project” ka thaaiñ kawa kattu daw man sakhiat ko.
Neiliang u montri ka chnat yalehke u Banteidor Lyngdoh da khana u wa da jied yaka Wahiajer neidaw wa man ko i thaw wa hapyrdi kawa ym em jngai na Shillong heiwa deiwa pynman yaki lympung yalehke wa heh ha kani ka thaw daw yarap ko leh wow pynkyllooid yaka sor Shillong.
Da ong u leh waka ri-loom Jaiñtia da pymih ko chiboon ki khloor yalehke khamtam kani ka thaaiñ wei emhok ko wow yoh ya kani ka thaw yalehke wa thymme.
U Conrad Sangma hawa e yei klam da e khublei wei da yaroh u yaka chnat yalehke kawa da kreh chitom wow kyntu kynrong yaki kaam yalehke cha ki kyrdan wa heh deiwa pynrap, “Ha-o ym ye u len wa nachwa ki kaam yalehke toh kiwa chah ieh nadooh i wym biang ki tiar ki tar, ki thaw yalehke kamjooh hanla em boon kiwa em yei sap wei thrang mynsien wow chim yei yalehke Sports kam ka laad im-ja kpoh iwa da man iwa sepai.”
Da khana u leh wa hadien wa chimkti u, da khyrngiat u wow tip wa kiwa jop takma (Medal) yaka jylla jooh e yaki du T. 7000 donhi katwa kiwi ki jylla da jooh e ki daki lak tyngka yow pynchlur, yow e mynsien wei kamjooh yow yarap ya kiwa da wanrah burom yaka jylla. Kamtæ da ong u wa hapoh ka sorkar MDA, ha ka jylla leh da pynku yow poi lak tyngka i e yarap.
Da ong u leh wa ym ye wow chna Stadium ha waroh ki thaw, kamtæ da jied yaki thaw kiwa daw ye wow pynmih wei wow yarap ya kiwa em yei sap.
Chooh chooh da khana u wa ka Wahiajer daw yoh ko leh yaka Driving School ka wow man kam ka thaw sikai yah kari ya kuti kiwa daw yaleh License wei da em chooh kiwi ki kaam wa daw wanrah cha kani ka thaaiñ kiwa daw pynbna ka sorkar ha i por wa biang.
Hajrong i pynman yaka National Games hapoh ka jylla, da khana u wa dang yang donhi yei pynbiat tarik ka Indian Olympic Committee.
Da pyntip u leh wa yei sdang u chna ya kani ka Sports Complex daw pyndep hapoh 20 bnai wei i kreh u sdang ko 30 sngi nadooh wa e yaka Work Order wei da yooluti u leh wa chwa ka Christmas 2022 daw ye u wai noh ya kani ka thaw yalehke.
