Hadien wa ki paidbah wa chong chnong yong ka Pynthorlangteiñ, Muphlang, Mustem, Iongnoh wa kiwi de kiwa haap hapoh ka West Jaiñtia Hills District da maad ki yei chah ktah ki yung ki sem kamjooh ki hali ki pynthor wa rep kba ki ha u slap wa u phria wa joor iwa da jia ha ka 5 tarik uni u bnai, ynne ka sngi neiliang u MLA ka 2-Jowai Constituency, u Wailadmiki Shylla da hiar u cha yung krehkaam u Deputy Commissioner ha Jowai wow chim yukheiñ na ki bor District wa hadooh katwon i chah ktah kiwa chong chnong nadooh ki yung ki sem kamjooh ki thaw rep khnang wow yaleh u pynsmat u e yarap cha kiwa chah ktah.
Hadien wa yachem wa ki bor District, u Wailadmiki Shylla da khana u wa da em kamwa 9 tylli ki chnong wa chah ktah kiwa haap hapoh ka Thadlaskeiñ wa Amlarem C&RD Block, wei i chah ktah wa boon dooh toh na u phria uwa da pyntlor ya u kba wei ka thaw waroh wa chah ktah dapoi 131.62 Hectare, ki yung sah wa chah ktah won 32 tylli ha chnong Muphlang, 5 ha Pynthorlangteiñ, 2 ha Iongnoh wa 5 ha Mustem.
Hawa yatoh wa ki laad yarap da ong u wa neibynta ki yarap wa jhan da kyntu u wa toh u pynlait smat noh ya ki tin sap yung ha ka tayaaw wow wan.
Katwa neibynta i chah ktah u kba, da kyntu u ya ki warep wow yaichah ki neibhah neiliang ki chnat sorkar daw hap ki wow lai pait yow pyntikna yei thaw wa chah ktah wei wow phah leh ya ka Report cha Shillong neibynta wow yoh yei mynjur.
Chooh chooh da ong u wa hawa yatoh wa ki laad e yarap boonsien ki paidbah jooh ood ki wa duna i, tangwa da pynche wa toh neidaw wa hap bood katkam ki kyndon ka National Relief Fund wei ym ye wow pyntam næ pynduna na iwa da booh, katæ ka Rs. 8500 neibynta chi Hectare i thaw.
Neibynta kitu ki warep kiwa da dooh symbe wow rep ha u snem wow wan, da ong u wa daw yaklam wa ka sorkar kamjooh ka chnat rep wow thooh ki laad yarap neibynta yong ki.
Discussion about this post