Ka Meghalaya State Legal Services Authority (MSLSA) kawa hapoh yong ka National Legal Services Authority (NLSA) ynne ka sngi da pynman ko ya ka Conference kam chibynta yong ka Pan-India Awareness and Outreach Programme wa ka Azadi Ka Amrit Mahotsav ha Yojana Bhavan, Main Secretariat, Shillong hajrong ka phang “Access Justice for All”.
U Justice Dinesh Maheshwari, Judge, Supreme Court India da man u kam u kongsan hei emlang u Justice R.V. More, Chief Justice, High Court Meghalaya uwa man leh kam u Parton-in-Chief ka MSLSA, u James K. Sangma, u montri ka chnat aiñ, u Justice H.S. Thangkhiew, Judge, High Court Meghalaya wa Executive Chairman ka MSLSA wa u Justice W. Diengdoh, Judge, High Court Meghalaya.
U Justice Dinesh Maheshwari, hawa e yei klam da ong u wa kani ka Programme wa da sdang da ka NLSA kam chibynta yong i dap 75 snem ka ri ymtoh u man ko ha i naam donhi wei kamtæ da rai wow pynman ya ka Meghalaya Judiciary wa ka sorkar jylla wow pyntikna wa waroh ki bru yoh ki yei bichaar wa hok wei iwa sakhiat.
Da ong u wa kamwa man katni emkaam bha wow poi næ wow kynjoh cha ki paidbah ha ki chnong neibhah boon ym tip ki yei mut i kyntien hok (Justice) kamtæ emkaam wow pynman ya i pynsñiawthooh wei u pyntikna wa ym em wa chah pyndooh yei hok yong ki næ wot wow tip ki ya ka luti wow yoh yei hok.
U Justice R. V. More hawa e i klam hajrong ka phang yong kani ka sngi da ong u wa waroh em ki yei hok wei ymem wa ye u kyntait yeini wei ya ini da thoh wot ha ka riti synchaar ka ri.
Da ong u wa ka Legal Aid man ko kawa kongsan tam wow pynsñiawthooh ya ki paidbah yei yarap wow yoh ki yei hok yong ki. Da ong u wa ka Legal Aid ym mut ko du hei wow yakhun mukotduma tangwa emkaam u pyrkhat ñiaar ki bru heiwa ka MSLSA da kreh ko wow wanrah ya i hok neibynta ki bru waroh deiwa pynman ya ki esikai, ki pynsñiawthooh paidbah hajrong ki aiñ wa kiwi kiwi.
U James K Sangma hawa e yei klam da ong u wa ka imlang sahlang dang em dang sah ko hapyrdi ki kaam wa boonjait neidaw wa wan ka khlam COVID-19, ki hok manbru da chah khoom chah kdoh ki. Da ong u wow khai neini emkaam wow wanrah ya ka luti ka wow pynkhlan ya ki yung bichaar wei wow e yei hok ki bru wa da chah mylliñ.
Ha kani ka sngi u Justice Dinesh Maheshwari da sdang u leh ya ka Facebook Page wa u YouTube Channel ka MSLSA.
