I pynkhreh ya ka Lympung wa 21 yong ki Khynnah Seng Khasi Seiñ Raij ka wow man haka 17 wa 18 tarik uni u bnai ha chnong Tuber Shohshrieh, East Jaiñtia Hills District da lai ko chait chait chakhmat nadooh i pynkhreh ya ki rynsan pynman lympung ha madan Nohsiang, i chna ya u sarok wow lai cha i thaw pynman lympung, ki thaw pynyieñ kari, neitæ i pynkhooid paidbah ya ki luti syngkieñ wa kiwi.
Ha ini i pynkhreh da chimbyntalang nadooh kiwa yahkhmat ka Lympung ki Khynnah Seng Khasi Seiñ Raij, kiwa yahkhmat ka Seiñraij Chnong Tuber Shohshrieh, kiwa yahkhmat chnong ka chnong Shohshrieh, ki paidbah wa chong chnong najrong ki chnat krehkaam sorkar.
U Waheh Chnong ka Tuber Shohshrieh, u Lar Bang wa u President ka Seiñraij Chnong Tuber Shohshrieh, u Ram Muruh, hawa klam cha kiwa thoh khubor ynne ka sngi pynsñiaw ki i kmen wow pdiang ya kani ka Lympung, heijooh i por pdiang sñiawbha ki ya waroh ki paidbah na kylleiñ ka ri-loom Khasi wa Jaiñtia cha kani ka Lympung. Kyrpaad haroh ki wym toh u tieñ heiyatoh wa i baam i dih, khamtam ki Delegate kiwa hap wan sah chwa neibhah wa da pynkhreh ki thaw sah deilang i baam.
Neitæ sñiawkmen haroh ki wa deiwa wan kani ka Lympung, kam ka chnong leh yoh ki chiboon i myntoi na ki chnat sorkar.
Neiliang u President ka Lympung ki Khynnah Seng Khasi Seiñ Raij, u Puramon Kynjing ong u kani ka Lympung toh i pynkut ya ka tamasa lehkmen ki khynnah wa da pynman nadooh u December 2025.
Ha kani ka sngi pynkut daw pynman yei lehkmen ki khynnah ki wow pynyoo yei sap i phong lyngba ki riam, lyngba i klam i khana, wei kamwa kani toh ka Lympung wa kyrpang ki khynnah, daw pynlai leh da ki khynnah hi katwa ki bru waheh won u man ki kam kiwa yahkhmat.
Heiyatoh wa ki luti syngkieñ, u Puramon Kynjing khana u wa i jngai na Jowai cha Tuber Shohshrieh toh kamwa 15 Kilometer. Yow lai cha i thaw man Lympung hap u psiah na u surok wa da pynkhreh kyrpang najan ka Yung Duwan Tuber Shohshrieh.
Da pyntip leh wym em iwon iwon i pynkhreh Car Pass ya kiwa wan, heiwa kiwa poi smat yoh ki u booh kari hajan i thaw pynman Lympung.
Heijooh i por kyntu haroh u ya ki paidbah wym toh u booh kari ki harood sarok tangwa ha ki thaw wa da pynkhreh khnang yow lait u thut i psiah i mih ki kari.
Wei neidaw wa ka thaw man lympung em ko pyn hajan sarok, kyntu u wow poi smat cha ka lympung khnang yow lait u thut ki luti, najrong wow man kiwa lehkhooid.
Discussion about this post