Kam chibynta i lehkmen ya ka Global Youth 2025 wei wow e chkari ya ka imlang sahlang, ka Nursing College of North East Adventist University (NEAU), ynnin ka sngi da pynman ki yei e snaam sñiawbha ha Jowai Civil Hospital Blood Bank deiwa wan 38 ngut heiwa 33 ngut da yoh ki wow e snaam.
Kani ka Global Youth Day toh kawa da lehkmen chisien chisnem da ka yaseiñ khynroo ka Balang Seventh-Day Adventist iwa da sdang wow leh nadooh ka 13 tarik u Wisu (Mar) 2013, yow pynchlur ya ki khynroo wow leh ya ki kaam wow yarap para bru.
Ha uni u snem dadep leh u pynman ki pynkhooid chnong, ka Workshop heiyatoh wow yada rymaw, ka Health Camp, i lai cha ki Hospital, ki Jail, ki De-Addiction Centre, i thung dieñ wa ka Blood Donation Camp.
Ya kani ka lai e snaam da leh deiwa ya krehlang wa ka District Legal Services Authority ka West Jaiñtia Hills District yow pyntikna wym duna snaam ka Blood Bank.
Neiliang ka Dr. Ibansara Khyriem, Director i/c Jowai Civil Hospital Blood Bank, da pynsñiaw ko yei sñiawngooh ya kiwa wan e snaam deiwa ong, “Iwa leh ki khynroo khyllood toh i wym ye de u kheiñ dor neibhah de ye ki wow e laad ya kiwa kjut wa chitom wow lait ki nei maa wei kamjooh wow e laad biang ya ki u im ki najrong wa pyntikna leh wa ka Blood Bank man ko kawa dap snaam.”
Kiwa wan e snaam kiwa boon toh kiwa lai puræ wei da em leh kiwa kreh kani ka University.
Discussion about this post