Jowai: Ka Jowai Civil Hospital Blood Bank, da pynman ko yaka e snam sñiawbha namo ka Blood Donation Camp ha Jowai Blood Bank, Panaliar, Jowai ynne ka sngi yow pyndap yeiwa emkaam snam yow ye u yarap ya kiwa emkaam khamtam ha kini ki por wa em ka Lockdown. Ki khynroo naka North East Adventist College, Khliehtyrshi deilang wa u Job Kawlni, Lecturer Sociology Department, North East Adventist College da wan ki chakhmat wow e snam.
“Ha kam kini ki por emkaam i chiboon kiwa wan e snam yow ye u yarap ya kiwa emkaam snam kiwa em leh kiwa ym yoh u mih wow lai e kylliang ya i snam wa da yoh yarap ki neidaw wa em ka Lockdown kamjooh yow pitkna wa ym duna snam hapoh ka Blood Bank,” da ong ka Dr. P. Shylla kawa pait ya kani ka Blood Bank.
Ka Doctor Shylla da kyntu ko ya kiwa chong chnong ka Jowai kamjooh kiwa em cha jan wow wan e snam sñiawbha, da pyntip ko wa ka Blood Bank Hospital man ko kawa wai ha waroh ki sngi wa man kreh nadooh 10:00 waje i step hadooh 5:00 waje i janmiet.
Ka Doctor da e khublei ko ya kiwa wan e snam sñiawbha khamtam kini ki yong ka Adventist College kiwa da wan e snam man ka por, yaka Jowai RSS kawa dang wan e snam dang ini wa dep heipor wa em ka Lockdown deiwa pynchlur ko leh yaki wow wan e snam ki dei langær.
Kiwa wan e snam naka North East Adventist College da pynsñiaw ki yei kmen hei wow ye u leh yei bhah yong ki wow e snam sñiawbha kiwa da em 14 ngut ynne ka sngi.
Discussion about this post