Shillong: Ka National Human Rights Commission (NHRC) da phah ko ya ki le ngut ki dkhot wow thooh yutip hajrong i man i long ka nongbah Shillong hadien i awri wa da mih ha ka 31 Naisan na i jia ha Sweeper’s Colony, Them Iewmawlong.
Ki dkhot ka NHRC kiwa em le ngut da lai pait ki leh ya ka Them Iewmalong ynnin ka sngi, wei da paan yutip leh hajrong ini iwa jia nadooh wa sdang i kynaad wa kynthup na ki CCTV, ki dur, ki khubor wa mih hajrong ini i jia, ka bui (report) wa man ka sngi na ki pulit wa kiwi kiwi.
Kini ki le ngut ki dkhot ynne ka sngi Walang da lai yachem ki leh ya ki bor District wa kamjooh ki pulit wow paan yutip hajrong ini i awri.
Hawa yaklam wa kiwa pathai khubor, u dkhot ka NHRC, u Rajbir Singh da ong u wa i wanpoi ki cha Nongbah Shillong toh wow takit wei wow sylli bniah hajrong i awri iwa da jia wow rah yeiwa chem ki cha Delhi.
Ha iwi i liang u IP Singh, uwi na ki dkhot ka NHRC da ong u wa ha ini i wan takit ka Commission da lai yachem ko ya ki bru na waroh arliang, ki sahep na ka tnat pynroi sor, wei hadien ini daw pynbiang ya ka bui chwa wow phah ya ka cha Delhi ha kani ka sngi Thohdieñ.
Discussion about this post