Ki khynroo khyllood kiwa na Uttar Pradesh hapoh i pyrtuid ka Ek Bharat Shrestha Bharat Mission Yuva Sanga, ha ka 2 tarik uni u bnai da wan ki cha ka Raj Bhavan, Shillong yow yachem wa u Lat ka jylla Meghalaya, u Phagu Chauhan.
Hawa yaklam wa kini ki khynroo khyllood wa dang lai puræ, u Lat da klam u chaphang kiwa boon ki liang ka Ek Bharat Shrestha Bharat Mission deiwa pdiang sñiawbha ya ki cha ka jylla.
“Nga sñiawkmen O wow yoh u ya embynta wa phi ha ini i por wei da tip i katwon em boon jait ki jaitbru kamjooh ka dustur riti ha ka thaaiñ North East India. Tangwa sñiawsih wa waroh kawi ka India duna bha tip ki chaphang kani ka thaaiñ,” da ong u Lat.
Chooh chooh da ong u wa kani ka Exchange Program ka Yuva Sangam da wan ko heipor wa biang bha yow tip ka India chaphang ka dustur riti ka North East. Heijooh i por da ong u wa kiwa em ha North East leh daw tip ki chaphang ki dustur riti yong kiwi ki bynta ka India hawa wan kiwa na kiwi ki jylla.
Ka Ek Bharat Shreshtha Bharat Yuva Sangam toh kawa kreh deiwa yah ya ki khynroo kiwa na North East cha kiwi ki bynta ka ri wa kiwa na kiwi ki bynta ka ri cha North East yow ya pynsñiawthooh yei rukom im ki bru ha kiwa boon ki liang yow wanrah yei ya sñiawthooh yei angnood ki bru wei wow ya pyntohlok hapyrdi ki khynroo.
Kini ki khynroo khyllood hawa lai ki cha kini ki thaw da pynyoo ya ki chaphang ka Paryatan (Tourism), Parampara (Traditions), Pragati (Development), Prodyogik (Technology) waka Paraspar Sampark (People-to-people connect).
Ya kini ki Yuva Sangam Team na Uttar Pradesh da wan yah da ka Babasaheb Bhimrao Ambedkar University, Lucknow wei da pdiang ya ki da ka North-Eastern Hill University, Shillong.
