Jowai: U montri ka jylla Manipur wa pait ya ka tant Health Department, u Jayantakumar Singh wa uwa pait ya ka tnat Sports, u Letpao Haokip ynne ka Sngi Choh-that da lai yalap ki ha kiwa boon tylli ki dong hapoh South Tura Constituency chirup wa u kyrtong ka NPP uwa man leh u montri rangbah ka jylla, u Conrad K Sangma wow paan yei kyrchaan ya oo.
Ha ka dong Modynagar, Tura, u Singh da ong u wa u Conrad Sangma da wanrah u ya ka Party ha kylleiñ ka thaaiñ mihsngi wei man u uwa kreh chitom wow pynpoi thong ya ka kamwa kwah u (T) Purno Sangma.
Hawa paan yei kyrchaan na ki paidbah u Singh da kyntu u ya ki paidbah ka South Tura wa ymtoh u chah pynbiej hi-eh ki ha ki khubor thok wei ka Party khmied ko cha ki paidbah ka Tura wow kyrchaan pura ya u Conrad.
U Haokip hawa e yaroh ya u Conrad Sangma, da ong u wa em boon ki seiñ saiñ hima ha ka thaaiñ mihsngi kiwa khmied cha u Conrad wow yahluti ya ki wei oo da ye u wow pynyatoh wa ki jylla waphær waphær ka thaaiñ.
Da ong u wa u Conrad kam uwa yahkhmat ka thaaiñ mihsngi sñiawkhia u ym du ya ka Meghalaya tangwa ka thaaiñ hi waroh kawi uwa da klam heiyatoh wa ki khian paaid wa ki Christan wot hadooh ha New Delhi.
Ha kani ka lai yalap da emlang ki khynroo kiwa yahkhmat ka party na jylla Nagaland, Arunachal Pradesh wa Manipur wei kini da lai ki cha ki thaw waphær waphær ka South Tura Constituency wow jied ya u Conrad.
U Billykid A. Sangma, uwa man leh kam u MLA warim ka Tura da synraan u ya u Conrad Sangma ha ki yalang waphær waphær uwa da e yaroh ya u Conrad kam uwa yahkhmat ya ka jylla.
Hawa paan yei kyrchaan na ki paidbah, u Billykid da mong u wa du u Conrad Sangma donhi uwa ye wow pyntikna wa poi ki kaam pynroi ym du hapoh Tura tangwa ka jylla hi waroh kawi.
Discussion about this post