Ka PRIME (Promotion and Incubation of Market Driven Enterprises) ka jylla Meghalaya da ya krehlang ko wa kawa pynhær lieñsuiñ na ri Germany ka Lufthansa Airlines deilang waka chnat NGO yong ka kawa tip kam ka Help Alliance yow pynman ya ka Impact Week Meghalaya 2022 hajrong ka phang “Train the Trainers” kawa man ka esikai (Workshop) ya kiwa sikai hapoh ka PRIME wa da pynman ha ka 9 tarik uni u bnai ha PRIME Startup Hub Shillong yow yarap saiñdur yei rukom pyrkhat kiwa kwah u seiñ khih kiwa da chah sikai hapoh ka PRIME deiwa leh daka Design Thinking Methodology.
Kiwa sikai napoh ka Lufthansa Group da sikai ki ya ki 25 ngut kiwa da chah jied na kylleiñ ka jylla kammon wow leh da ka Design Thinking Methodology yow pynsmat yei rukom pynmih ya ki buit wa thymme, i rukom pynlai yei kreh wa kiwi de.
Ya kani ka Workshop da sdang da ki kyntien pdiang sñiawbha na u Flo Oberhofer, Program Head, PRIME, iwa da pynbood sa i ktien wai phang na ki dkhot ka Impact Week kiwa da em dei bru wa kiwa chimbynta lyngba ka Internet.
Kiwa chah sikai da bhah ya ki ha ki 4 bynta hapoh i pait uwi uwa sikai yow yoh yei sikai wa bniah hajrong kammon wow pynkylla yei rukom pyrkhat yow man kiwa mihsoh mihsla.
Da pynkut ya ka Workshop da ka Q & A Session yow pait hadooh katwon da sñiawthooh ya iwa chah sikai.
Neiliang kiwa chah sikai leh da yoh ki wow khana yeiwa sñiaw ki hajrong ini i yoh sikai ki deiwa kyrmen wa daw yoh biang ya kam kani ka Workshop ha ki por wow wan yow ye ki wow sikai kylla ya kiwi.
Ka bhah wa bood kani ka Impact Week 2022 Meghalaya daw pynman won neibynta kiwa chah sikai ka PRIME deiwa chimbynta plat 50 ngut ki khynnah ka PRIME kawa daw pynman ha ka 23 tarik uni u bnai hajrong ka phang Livelihood Creation, Pollution wa Sustainable Tourism.
