Kiwa kreh ka JHADC ynne da mih yakhih chong kyllaiñ myngngor biang ki hapoh ka lama ka Jaiñtia Hills Autonomous District Council Staff Association, kawa da pynman ha pchem ka JHADC hi neidaw wym pu yoh yaka tulob wa sahteiñ la 9 bnai heiwa da wan mih syndet u MDC wa yahkhmat ka liang pyrchah ka JHADC, u Awhai Andrew Shullai wow pynsñiaw yei kyrchaan hajrong ini i yakhih dooh tulop.
Hawa klam hakhmat kiwa kreh ka Council kiwa pynman yakhih ong u, “Waroh chi katttu wym jooh emlang O wa phi tangwa ha kani ka kynti wym banse de O neibhah da yoo O wa kani toh ka wow yah cha wa lait, wei sñiawthooh O leh ka kaamram u pynyoo yei emlang O chirup wa phi hei yatoh wa kani ka yakhih”.
Da pynkynmoo haroh u wa dang ini wa dep wot haka dorbar tlang ka JHADC da booh yukylli u yaka Executive Committee hajrong ki chithi pynkynmoo wa da phah ko chaka sorkar jylla neibynta u su yaka bhah poisa ka Council, tangwa hanla boosien da phah ki leh wym jooh em won yoh ki tang kawi leh ka jubab.
U Awhai Andrew Shullai da sngoh haroh u yaka Executive Committee ka JHADC deiwa ong hawa lai yachem ki waki heh leh ym jooh em itæ i kular næ i yathoh yataar wa mih neiwa yachem lang heiyatoh waka bhah poisa yong ka Council tangwa ka yachem da kut hi-eh ko du hei dih cha sñiawbha, wei kani hi pynyoo ko yei kaam ke donhi.
Ha kani ka yakhih chong kyllaiñ myngngor kiwa yahkhmat ka Jaiñtia Hills Autonomous District Council Staff Association da puræ haroh ki yaka chithi kawa da yoh pdiang ki naka Secretary yong ka Executive Committee haka 17 tarik uni u bnai.
Heiyatoh wa kani ka yakhih katkam i pyntip u President ka Jaiñtia Hills Autonomous District Council Staff Association, u Johnson Pohrmen, ong u wa hei sakhiat da thmu u pynman le sngi lynter tangwa neidaw wa ka Executive Committee da kular ko wa la kammon kammon hapoh uni u bnai daw pyrchang pynyoh yaka tulop kamtæ yaka yakhih daw sangeh chwa ko.
Discussion about this post