Ka khubor wa chah thngan ka Bindas Syiem kawa na Ri-Bhoi da poor smat ko heiwa da wan kiwa boon bha ki bru khamtam na ki seiñ wa ki bru paidbah wow e mynsien ya ka.
Kani ka kong da chah thngan ko nadooh ynnin ka sngi ha pchem ka Additional Secretariat, Shillong yow dawa chna pynbha noh ya u sarok Nongpoh-Umden hadooh Sonapur uwa da jæd da pra hadooh wa ki paidbah wa lai wa wan da maad ki yei eh wa joor bha.
Ynne kam chibynta wow pynche, da wan u Executive Engineer ka Nongpoh PWD Division uwa da wan wow yaklam ya ka wei da pyntip u leh ya iwa da leh ka sorkar yow pynbha ya uni u sarok.
U Executive Engineer da pyntip u wa i thmu wow pynbha ya uni u sarok da sahkut neidaw wa pynkrehkaam ya ka Model Code of Conduct wa em ka Election MP, wei ka PWD da pynkhreh ko ya ka Detail Project Report (DPR) leh hajrong ini tangwa chong sa hei yoh nei mynjur na ka sorkar pyrdi.
Neiliang kani ka kong wa chah thngan da kyntait ko wow pdiang yeini neibhah wa ngait ko wa kwah ko wow yoo yei kaam ymtoh du i ktien donhi.
Kam wow pynkynmmo wa kani ka kong da kyntait ko wow kyrriah na ini i thaw hadien wa ki bor District da phah mih ki ya ka na katai ka thaw neidaw wym yoh bor ko.
Da khana ko wa da dep ko wow paan bor tangwa ym em e bor ya ka wei da neh bait ko ha itai i thaw.
Da wan leh ynnin wa ki dkhot ka Hynniewtrep Youth Council kiwa da yachem wa kani ka kong heiwa neiliang u President ka HYC, u Roykupar Synrem da beiñ u ya ka sorkar wa kiwa mihkhmat kiwa da kular hi-eh ya ki paidbah ya uni u sarok uwa kattu da sah la 15 snem khlem da pynchna de wot hawa ka mang poisa yow uni u sarok da em ko.
Neiliang ka chnat i chait i khiah da phah ko leh ya ki Doctor yow pait yei long i man kani ka kong.
Discussion about this post