Jowai: Ha kini ki sngi wa da dep da em uwi u bru wa tip kam u Hamehi Bamon uwa da thoh pyrchah ya ki bru wa ngait ya ka Niamtre ha kawi ka Group wa em ha Facebook deiwa ong wow pynwiar jait noh ya ka Niamtre iwa da ktah joor yei sñiaw kiwa boon.
Hadieñ wa da thooh tre da chem wa uni u bru toh uwa na Khonchnong wei ka Seiñraij Jowai da ujor FIR ko pyrchah ya uni u bru.
Ynne ka sngi ki pulit da phah hajir ki oo heiwa da emlang leh ki dkhot ka Seiñraij Jowai heiwa u Hamehi Bamon da pynche u ya iwa jia.
Da ong u wa ha ka sngi wa thoh u yeiwa thoh u toh hadien wa jrong bha ka yaknia ha Facebook Group chaphang ka niam wei ym mut u wow poi cha u pood wa jia kamni wei kamjooh leh da dep pyndam u yeiwa thoh u wei da dep paan maap u leh ha ka jooh ka Group tangwa yei wa thoh nyngkong u da em wa chim Screenshot ki wei da yoo lut ka pyrthai.
Hadien ini u Hamehi da ong wa da pynyoo ki lok u wa sa du i dur yong oo wa thooh ki bru ya oo ha Facebook hadooh wa ym nood de wot tang wow mih na yung.
Ha khmat ki pulit wa ki heh ka Seiñraij u Hamehi da paan maap u dei mon yong oo wa ym mut u pyntakha mynsien ya kiwi, wei da kyntu u ya kiwi leh wym hoi u chongchit u yañia chaphang ka niam wei ya kiwa dang em ya iwa thoh u wow Delete noh ki ki.
Neiliang ka Seiñraij da pdiang ko yeini i paanmaap wei da pyndam ki leh ya ka FIR deiwa kyntu wym boi pynchitom ya uni u bru wei wow pyllait ya oo khlem pynngat ha kawon kawon ka kyndon aiñ.
Neiliang ki pulit leh da ngait ki ya ini wei da poi cha i yasuk.
Discussion about this post