Ha ka 28 tarik uni u bnai, ki bor sorkar ka Assam da lai pait ki yei thaw wow chna ya ka Border Outpost ha i bynta wa dang haap hapoh u pood u ang ka chnong Lapangap, West Jaiñtia Hills.
Ha katai ka sngi da wan wow pait wow sylli yeini i thaw da kiwa mihkhmat yong ka sorkar Assam wa kynthup ya u Rupsing Teron, MLA ka Baithalangso waka Rina Terangpi kawa man kam ka Executive Member ka Karbi Anglong Autonomous Council wa kiwi de.
Neiliang u Waheh Chnong ka Lapangap u Deimonmi Lyngdoh da ong u wa itai i thaw wa wan pait ki heh ka Assam yow booh yaka BOP toh hajan ka chnong Langkiroi wa em harood ka wah Langsangti wei hei ktien Pnar ya kani ka wah da tip kam ka Wah Yong-O wei yeini i thaw da tip kam ka Yingkieñ Psiang kawa em ka yingkieñ wa da chna nadooh i por u Dr. Norman Tunnel ha u sarok wa lai lyngba ka chnong Lapangap-Khanduli uwa da dep pynkreh lyngba ka Scheme MGNREGA daka chnong Lapangap, Khanduli, Umshangiar waka Pdeiñ Talo ha u snem 2021.
Kamtæ neiliang ka Dorbar Chnong Lapangap Pyllun da pyrchah joor ko ya itai i wan pait ki heh sorkar Assam kiwa da thmu wow booh da ka BOP ha u loom wa em hajan katai ka wah neibhah katai ka wah kamjooh i thaw dang haap ko hapoh i thaw yong ka chnong Lapangap wa em hapoh ka Elaka Shilang Myntang kiwa da jooh im sngi ki wow rep wow riang ha itai i thaw kamjooh leh wow lai wei wan yaaw na utai u sarok.
