Kam chibynta i pynkreh ya ka 6th Meghalaya Games 2025, kawa daw pynman ha West Jaiñtia Hills District, ynne ka sngi kiwa mihkhmat ka Meghalaya State Olympic Association (MSOA) hei yahkhmat u Working President, u John F Kharshiiing wa u General Secretary, u F.L. Pariat kumjooh kiwa mihkhmat napoh ka State Sports Association, Meghalaya da wan hiar ki cha West Jaiñtia Hills District yow lai pait ya ki thaw kiwa ye u pynman ya ki yalehke wa boon jait, kamjooh leh lada toh iwa emkaam wow wanrah chooh chooh u chna kiyi kiyi næ wow pynbha pynmiat ha ki rukom waphær waphær.
Ha chwa wow hiar lai pait, da em ka yalang ya phyllu yumut ryngkat wa u District Sports Officer ka West Jaiñtia Hills District, u K. Passah deiwa emlang kiwa mihkhmat ka West Jaiñtia District Sports Association (WJDSA) wa kynthup ya u Vice-President, u Patrick Lamare wa u Football Secretary, u Nangebor Suting wa kiwi kiwi de.
Ki thaw wa da lai pait kynthup i ya ka Kiang Nangbah Stadium, ka Don Bosco Secondary School, Mihmyntdu, ka Bosco Pnar wa em ha Salini Colony, ha Kiang Nangbah Government College, ka Amphitheatre wa em ha Police Reserve, ka Jowai Polytechnic, ka Khadar Daloi Law College, ka Tome Memorial Higher Secondary School, Mooralong, ka Jowai Public School, ka Government Boys’ wa Government Girls’ Higher Secondary School, ha Marianhill Higher Secondary School, ka St. Mary Mazzarello Girls’ Higher Secondary School wa kiwi kiwi.
Neitæ da lai pait leh ya ka madan Jrisaleiñ wa ki Indoor Stadium kiwa em hapoh ka chnong Jowai wa kynthup ha Khimmusniang, Chutwakhu, Dulong, Tpep Pale, Mission Compound, ha Presbyterian Hall, ha Chilliangraij, Ladthadlaboh, ha Seiñraij Indoor Sports Hall wa kiwi de.
Na Jowai da mih won ki yow lai sa cha Ummulong.
Heiyatoh wym em Swimming Pool, neiliang u DSO da pyntip u wa daw chna kawi hapoh ka Kiang Nangbah Government College.
Discussion about this post