Wan psiah ki chipai BGB cha Muktapur yow phah pynsangeh chna sarok hapoh ka chnong

Jowai: Katkam ki Video wa da poor bha ha ki Social Media da pynyoo ya ki chipai ka Border Guard of Bangladesh (BGB) ynnin ka 20 tarik da wan ki cha Muktapur heithaw wa chna sarok chnong da kiwa chong chnong heiwa da pynbaad wa kini ki chipai wan pynsangeh ki ya i kreh ya u sarok.

Neiliang u Wyrta hawa yaklam wa u heh chipai ka BSF wow paan pynche hajrong ini i jia, neiliang uni u heh da pyntip u wa em hi i wan ki chipai BGB tangwa ymtoh wow pynsangeh yei kreh tangwa wan pait ki iyi chna ki ha Muktapur.

Da ong u wa ka Muktapur katwa man ko ka chnong kawa yajan bha wa u pood wa ka Bangladesh iwon iwon i kreh namo i chna wa heh ki chipai ka BGB ye ki wow wan pait ya i chna ki.

Heijooh i por da ong u wa em leh ki kynti heiwa ki chipai BSF leh ye ki wow lai cha liang Bangladesh wow pait iyi kreh namo chna ki lada i kreh man i iwa heh wei kini waroh toh wow wanrah yei chongsuk wow pyntikna wa em i chngaaiñ, ymtoh i chna wow pynkhreh thma.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Neiliang u K. Myrchiang uwa man kam u Secretary ka CCIB hawa yaklam u wa u Wyrta da ong u wa em sakhiat ini i wan ki chipai ka BGB wei hachwa ini ki BSF da ong ki ya ki tre chnong wa ym toh u chna ki ya uni u sarok neidaw wa em hu hapoh 150 Yard na u pood ki ar ri wei lada wan ki BGB, ki ym ye ki u leh iyi iyi leh.

U Myrchiang da ong u wa manda wan ki BGB, ki BSF yoo hi ki yeini tangwa ym em leh ki iyi iyi leh iwa da yoo la kamwa da ya krehlang ki.

Da pyntip u leh wa ka BGB da khang ko ya kiwa chong chnong ka Muktapur wa ym toh u chna sarok ki neidaw wa haap ka chnong hapoh ka 150 Yard wei hadien manda mih ki chipai ka BGB na kani ka thaw, da yaklam ki wa ki chipai ka BSF kiwa ym em leh iyi iyi leh.

U Myrchiang da ong u leh man ki por ki chipai ka BGB da wan maham wan pynteiñ ki ya kiwa chong chnong kahpood katwa ka BSF ym jooh em leh ki iyi iyi leh.

Kamtæ da kylli u wa em mo ka ya krehlang ka BSF waka BGB wow tooh yei thaw ka ri India wei ka ri ka India, ka sorkar jylla waka ri Bangladesh ym em ki wow pyrnkrehkaam yaka soskular wa da ya soi kawa ong chisien wa da krehkaam ko wow chna ya u pood wa pura, kani ka kyndon 150 Yard ym krehkaam de ko.

Da pynkut u Myrchiang deiwa kylli wa iyi i daw wa slem hadooh katni snem wow pynbait ya u pood u ang iwa da ktah bha ya ki paidbah.