Ka Press Information Bureau (PIB), Shillong, chirup i yakrehlang ka District Administration, Jowai wa ka Jaintia Journalist Association ha ka 30 tarik u March da pynman ko ya ka “A Varta- Media Workshop” hajrong ka Viksit Bharat—Guarantee for Rozgar and Ajeevika Mission (Gramin) (VB—GRAMG) wa kiwi ki Scheme ka sorkar pyrdi ha ka yalang wa da pynman ha Conference Hall ka Office u Deputy Commissioner West Jaiñtia Hills District, Jowai.
Ha kani ka Workshop da emlang u Additional Director General, NEZ, u Kripa Shankar Yadav (IIS), ka Additional Deputy Commissioner and Project Director DRDA, West Jaintia Hills ka B. Blah, u Gopajit Assistant Direct, PIB, Shillong heiwa da wan chimbynta nadooh ki BDO ka Laskein, Thadlaskein, Amlarem wa Namdong, ki sahep ka DIPR na ka West wa East Jaiñtia Hills District, kiwa mihkhmat na ka DDK, Akashwani Jowai, ka Synjuk ki Waheh Chnong Ri Jaiñtia wa ki dkhot ka NRLM wa SHG.
I thmu kani ka Workshop toh yow pynsñiawthooh cha kiwa kreh hei kaam e khubor heiyatoh ki laad ki luti wa ka sorkar da chim da leh ko kammon u wanrah ka laad yoh khih wei ka laad u im-ja hapoh ka Scheme VB-GRAMG wa kiwi tawon ki jait Scheme.
Hawa klam pdiang, u Gopajit Das, Assistant Direct, PIB, Shillong ong u kani ka Workshop toh yow pynsñiawthooh hajrong i em i pynkylla haka Scheme MGNREGA, heiwa ka sorkar India da rai ko wa yow rap pynbha chooh chooh heiwa da pynkylla leh yei pyrtuid cha ka Viksit Bharat—Guarantee for Rozgar and Ajeevika Mission (Gramin) (VB—GRAMG).
U Kripa Shankar Yadav ong u wa katkam i yooluti u Prime Minister, wa kat ha u snem 2047 ka ri India u man ko ka ri wa ku. Wei yow poi cha kani ka thong emkaam u ya chimbynta chimkhia nadooh kiwa sah palatsor, ki chong ki thaw hei wow pynku yei yoh i laa wei wanrah yei kaam pynroi waphær waphær.
Deiwa kdaw leh wa ka VB- GRAMG toh kawi naki bynta wa hakhmat wa ye u pynkhlan yei rukom im ki paidbah haki thaaiñ palatsor wa kamjooh leh ka laad wow yoh khih.
Ong haroh u kamwa kiwa thooh khubor em ki ka bynta wa khroo u wanrah ki yutip cha ki paidbah kyntu u ya ki wow yakrehlang waka sorkar heiyatoh wa kiwon kiwon ki kaam wa bha wa ki kaam wa ka sorkar da leh ko khnang wa kiwa boon ki paidbah u yoh myntoi ki.
Ka B. Blah won da ong ko wa ka Scheme MGNREGA da man ko kawa emkaam bha haka District wa ka jylla, heiwa boon ki manyung chaniah khih kreh wei im ki naka Scheme MGNREGA .
Pyntip haroh ko wa da boon ki yalang pynsñiawtooh wa dadep pynman ki ha ki Block wa ha ki chnong ki thaw wei yoh ki leh i jubab wa sñiawsuk na ki paidbah.
Da pynrap haroh ko wa heipor wa pynkylla na ka Scheme warim cha ka Scheme thymme boon kiwa kulmar, tangwa yow che ki paidbah hajrong i pynkylla da pyman chynnam ki pynche paidbah.
Heiyatoh i batai bniah hajrong i pynkylla thymme ya kani ka Scheme, da batai pynche da u M. Liting, District Programme Manager (VB-GRAMB). Hadien ini da em won ka Interactive Session næ u ya phyllu yachem yumut wa da kylli da kiwa thoh khubor, ki waheh chnong wa kiwi de kiwa da chimbynta.
Discussion about this post