Wan pyndem sa u Wanlambok wa mih pyrtuid ha ka case u Julius Dorphang

Shillong : Ha ka miet yong ynne ka sngi heipor kamwa 8 waje i miet u Wanlambok Khonsit uwa mih pyrtuid ha ki FIR wa em kti u hei yatoh wa ki kaam lehbeiñ ya ki khynnah kynthai ha Marvelene Inn, Rilbong da wan pyndem u ha khmat ki pulit ka Madanrting wei da emlang leh wa u muktiar yong oo.

Ki pulit da ong ki wa uni u bru leh da em kti u hei man kam u dalal wow pynyoh kynthai (Human Trafficking) wei da booh mukotduma ya oo hapoh ka aiñ Posco.

Deiwa wa kem ya u Wanlambok da jia ko hadien wa da yoh kem ya u Julius Dorphang uwa man kam uwi na kiwa chah kynnoh wa slaitbor u ya khynnah kynthai wa dang 14 snem.