Wan pyndem u dkhot ka HNLC hadien wa haap kreh mylla u ha Bangladesh

Shillong: Neidaw wym yahaap i mutdur wa i kaam wa leh uwi u khynroo wa dang 17 snem i rta wei uwa dang puræ class IX uwa da psiah cha ka seiñ kieñ suloi ka Hynniewtrep National Liberation Council (HNLC) ha u snem 2016 wei ynne ka sngi da uiñ biang u cha yung wei da lai pyndem noh u hakhmat SP (City) ka East Khasi Hills, u Vivek Syiem.

Uni u khynnah (ya uwa da murieh pyrtuid) na thaiñ Jaitia Hills da khana u wa i daw wa uiñ u toh iwa mutdur u wa i angnood u wa ka HNLC u yakhun ko neibynta ka jaitbru ym em man i iwa sakhiat manda poi u cha Bangladesh.

Da psiah u cha ka HNLC ha u Naiynru 2016 wei manda poi u ha Bangladesh, da phah sait that sait nep, da phah rep phah riang wei da man lakam wa kreh nongsngi ha yung ki bru.

Da khana u wa da jooh yoh ksoh u ya ka suloi tangwa ym jooh yoh u ya ka nongsngi wa kreh u, wei ha Bangladesh da sah u chirup wa uwi cha khloo heiwa ymtip u yi wa jia cha baar.

Related posts

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024

Da batai u leh wa da psiah u cha kani ka seiñ deiwa yoh u wow yaklam wa u Publicity Secretary ka HNLC, u Sainkupar Nongtraw lyngba ka Facebook.

Heijooh i por da ong u wa hadien kattu katni por wa yaklam ki, u Nongtraw da phah bru u wow lai tooh u ya oo (uni u khynnah) wow lai cha Bangladesh na ki thaiñ Amalarem, ka West Jaiñtia Hills.

Da khana u wa hadien wa sah ha khloo kamwa chi snem tam da chim noh u ka rai wow uiñ biang cha yung yow sdang noh u im thymme.

Uni u khynnah da ong u leh wa ha Bangladesh da lai lang u wa le ngut kiwi won kiwa da yoh laad wow uiñ chwa ya oo, wei oo da yoh u wow yut deiwa yarap ki kattu katni ngut ki bru.