Jowai : Kam chibynta wow pynkhreh ya ki khynroo khyllood kiwa thap kreh chipai wa i kreh pulit ka ophis u DC West Jaiñtia Hills ynne ka 31 tarik da pynman ki da ka Orientation Programme ha District Library Auditorium Mynthong, Jowai yow pynsñaiwthooh ya kiwa emkaam u leh ki ha chwa u yaleh ki ya ki kaam chipai wa ki kaam pulit.
Neiliang ki kaam chipai da wan u Brigadier William Sturgeon u wa da khana u ya waroh wa em i myntoi wa yoh kiwa krehkaam chipai kam i thaw sah mynkna, i baam, i sumaar manda kjut wa kiwi kiwi. Ong uwa ka sorkar sumar bha ko ya ki chipai na dong cha dong wei kamjooh leh da pyntip u wa boon ki laad wa em yow psiah kaam chipai.
Da ong u leh wa katni emkaam hadooh 11,500 ngut ki ophisar hapoh Army, Navy wa ka Air Force kamtæ ong u wa toh u chim kabu kam ya kani ka laad wa yoh katni. Da pynoo u leh ya ki kot ki sla wa ye ki khynroo khyllood u khreh yow pass ya ki exam kamjooh leh ki buit wa ye u pynemkaam ha ki “Physical Test” nadooh i rukom phet, i leh ‘Pull up’ wa kiwi kiwi.
Da batai u leh ya i rukom riam, rukom ah sniooh heipor leh ya ka Personal Interview.
Ya ki kaam pulit won da klam da u A. Wahlang, SI na Jowai Police Station heiwa da pyntip u ya ki kreh wa lait katni ha ki kaam pulit kam ka SF 10 kawa emkaam hadooh 628 ngut ki bru.
Da khana u leh ya ki kot ki sla wa emkaam yow thap kreh wei kamjooh da ong u wa hanlada ki kreh wa lait em ki hapoh ka Armed Branch waka Unarmed Branch tangwa ye u thap du iwi don hi i kreh ya uwi u bru kamtæ hap u jied bha deimiat katkam i bor kamjooh leh katkam i Educational Qualification.
Ha kani ka sngi da em kamwa 300 ngut ki chynrang wa kynthai wa wan cha kani ka Orientation Programme wei da yoh laad ki leh u kylli pynche ya waroh ki phang wa artatien ki.
Kamwow pynkynmoo wa i thap kreh kaam chipai daw pynman ha ka 13 tarik u Naitung (April) ha Dikki Bandi Stadium, Tura.
Discussion about this post