Ynne ka sngi u Chief Minister ka jylla, u Conrad Sangma chirup wa u Education Minister, u Lahkmen Rymbui deilang wa u MLA ka Khliehriat, u Kyrmen Shylla da wan wai pynku kyrdan ki ya ka Rymbai Secondary School cha ka Higher Secondary School.
Ha kani ka sngi da em ka yalang heiwa da yoh ki kyntien pdiang burom na ka Principal ka skur, ka Valency Lamare.
U MLA ka thaaiñ, u Kyrmen Shylla da e khublei u ya u Conrad neibhah wa kamwa kular u ya ka District da yoo bait wa man kaam ki heiwa da kynmoo u ya u 2018 heipor wa sdang ha ka sorkar MDA heiwa ki kaam pynroi da lai ki chaphrang.
Da ong u wa sñiawkmen u wow yoo ya ki sarok wa daw chna kam u Sutnga-Saipung wei da yooluti u wow yoh noh leh ya u sarok na Shkentalang cha Lumchyrmit u wow pynyabi ya ka East wa West Jaiñtia Hills.
Neiliang u Lahkmen Rymbui da ong u wa kani ka sngi u man ko kawa sahkhnmoo neibhah iwon iwa da kular ka sorkar da man sakhiat i hapoh i yahkhmat u Chief Minister wei ini jia i ha waroh kawi ka jylla.
Da ong u wa kani ka sorkar kreh ko liang wanang wow pynku ya i puræ puthi, i chait i khiah, ki khynroo wa kiwi deiwa kyntu ya ki paidbah wow krehlang wa ka sorkar.
Heiyatoh wa kiwa sikai da pyntip u wa chwa ka Christmas u pynbna ka sorkar yei rai ko.
Kam u kongsan, u Conrad. K. Sangma da kynmoo u yei por wa wan nyngkong u ha Rymbai nadooh wa man Chief Minister kamwa 7 snem tam heiwa u sarok da man uwa sih bha, ka Scheme saam um kawa da sangeh wei manda wan u ynne wow yoo yei kreh wa dadep pynsñiawhun mynsien bha i ya oo wow yoo yei kylla wa wanrah ka sorkar ha ki snem wa dadep.
Da ong u wa da man i kaamram ka sorkar wow wanrah yei kylla hanla ymtoh iwa suk wow leh yeini neibhah heipor wa sdang ha u 2018 da yoo chitom u wow wanrah yei kylla neibhah wa em chiboon i thut i rukom krehkaam ha ka sorkar nadooh ka poisa, ki rukom kreh ki chnat sorkar wa kiwi.
Chooh chooh da kular u wow kreh chirup wow wanrah ya ka Rymbai wa ka District kamjooh ka jylla chaphrang heiwa da ong u leh wa ym kular u iwon iwon ynne neibynta ka skur neibhah wa ym kwah u wow kut i du hei kular donhi.
Heijooh i por da pynbna u ya i kreh ya ar tylli ki sarok Sutnga-Saipung lyngba ka World Bank hei lut wa Rs. 110 klur heiwa daw pynkhreh ya ki DPR wei ki kreh u e kti ya ki hawa sdang u 2026.
Da pynbna u ya u sarok na Lumchyrmit cha Shkentalang lyngba ka DoNER Ministry ya kawa da pdiang na ka Ministry wei dang yang poisa neibynta i kreh.
Ha kani ka yalang da yoh leh i klam na u Jasyllokki Lyngdoh na ka chnong Rymbai, u Banteilang J. Kharshandi, Director of School Education & Literacy katwa u Rikidame K. Diengdoh, District School Education Officer da e u ya ki kyntien khublei.
Ya kani ka sngi da pynphooh da ki chaad wa ki rwai.
Discussion about this post