U Phasmon Dkhar, MDC ka Musniang Rngad ynne ka sngi da pynlait paidbah u yaki Ticket Lucky Draw yong ka Dorbar Chnong Iongkaluh, East Jaiñtia Hills District haka yalang wa da pynman ha pchem ka Immaculate Conception Church Playground, Iongkaluh Wahchnong, hei sakhilang ki waheh chnong na ki chnong wa marjan, kiwa chah khut sñiawbha wa kiwa chong chnong ka Iongkaluh.
Katkam i pyntip na u waheh chnong ka Iongkaluh, u Emil Phawa, u Secretary Fete Committee, u J. Stanley Dkhar wa u Chairman ka Fete Committee, u Baitlang Dkhar da khana ki wa ka thong wow pynman Fete kamjooh u dai yaki Ticket Lucky Draw toh yow pynmih poisa yaka chnong neibynta u pyntoh pyntne yeiwa emkaam wa dawa hapoh ka chnong ka thaw la heiyatoh ka yung Club, ka madanbol wa kiwi.
Da kyrpaad ki leh yaki lok ki jor najan na jngai wow sñiawbha ki u kyrchaan yaka Fete yong ki yow man kawa yoh nong yoh ni, kamjooh da pyn-eh-daw ki jar jiar ka bok ka nasib ya kiwa thied yaki Ticket Lucky Draw wa daw pynkhle haka 8 tarik u March 2024.
Ka Prize wa nyngkong ha kani ka Lucky Draw toh ka Bolero BS6 Optional, ka Prize wa ar toh ka poisa Rs. 1,00,000 katwa kawa le won ka poisa wa Rs. 50,000.
Neiliang u kongsan, u Phasmon Dkhar hawa klam ha kani ka sngi da yaroh u yaka chnong Iongkaluh wa da thooh ko ki laad ki luti hajrong kammon u pynmih yarong poisa neibynta ka chnong.
Heiyatoh i dawa wa da pynsñiaw wei paan yarap ka chnong na oo kam u MDC ka thaaiñ won, ong u wa neiliang yong oo hi smat u wow e, tangwa emkaam yaki bor chnong wow e ki dei thoh cha oo heiyatoh i dawa yong ki khnang yow leh u yeiwa emkaam.
Hawa pyneh-eh-daw pyn-eh-nasib yaka chnong Iongkaluh yow jop i mut i thmu ko, kyntu haroh u wow man ki kiwa kreh chitom wei ya burom kylliang ha iwon iwon i kaam.
Kiwi won wa e yei klam ha kani ka sngi leh yooluti ki wa kani ka Fete u man ko kawa lai bait lai ryntih wei kawa yoh nong.
Discussion about this post