Shillong: Ynnin ka sngi heipor wa wai ya ka Cherry Blossom Festival ha Shillong, manda poi ha nan Palok da em ka yalang pynwyrngia ya ki paidbah kam ka yakop miat kynthai wa kiwi kiwi, kiwa boon wa wan wa da yooluti wow pait yei phooh syntu ki dieñ Cherry Blossom wei da man ko kawa sñiawsih neibhah kini ki syntu ym em phooh ki.
Neiliang kiwa chna won ya ka film Pnar wa tip kam ka Thong Iong Nga wa kynthup leh kiwa ak ha kani ka film da pynyoo ki ya ka trailer ka film kawa da pynphooh da pynphieñ ya kani ka sngi heiwa da kyriaw ki paidbah wa kyrchaan ya kani ka phlim.
Neiliang ka Simi Khongthiang kawa man kam ka Director kani ka film da ong ko wa da wan ki ha kani ka sngi kam ka laad wow pynbna paidbah chaphang ka film yow pynchlur ym du ya ki paidbah ka jylla kamjooh leh ki baar jylla wow wan pait ya kani ka film neibhah da em ka English Subtitle heiwa ki wym sñiawthooh ktien Pnar leh ye ki sñiawthooh ya i parom ka film.
Chooh chooh da ong ko wa neidaw joor ki kaam Piracy kiwa saam paidbah ya ki film wa pynmih da ka CD wa ki DVD da rai wow pynyoo donhi du ha ki Cinema Hall, wei kini ki kaam Piracy da mut ko u tynyap ya ki kaam chna film hapoh ka jylla, kamtæ da kyntu ya ki paidbah wow wan ki cha khmat cha ki Cinema Hall wow kyrchaan ya kani ka film wa pynmih hapoh ka jylla wei neiliang ki paidabah chi sur da jubab ki da i hoi kiw.
Discussion about this post