Ha ka 21 tarik ka chnat Fishery deiwa emlang u B. Shylla, Fishery Supervisor, u R. Lytan, Programme Manager wa u M. Nowa, Multi Service Provider da wan ki wow pynman ya ka yalang pynsñiawthooh paidbah ha ka chnong Khatkasla neibynta ka Fish Sanctuary namo ka thaw yada yow heh u san ki dakha khlem em kiwa khwe wa pynthut.
U waheh chnong, u Nangeibormi Lamare hawa e yei klam da ong u wa katwon dap ki dei kmen wa wan ki sahep sorkar wow pynsñiaw ki neibynta kamon u pynneh pynsah ya ki dohum hapoh ka chnong wei da khana u leh wa da dep ki wow yachem wa u Superintendent yong ka Fisheries deiwa booh leh ya ka dorkhat wow pynneh ya kani ka wah Myntang nadooh Khat Ripiang hadooh Tre Thwai Jri kam chibynta wow yada ya ki dakha dohum, heijooh i por da kyntu u leh ya ki para jan chnong wow em ki i mynsien wow ya khrehlang khang wow ye ki wow yada ya kani ka wah wei wow yoh ko u man kam ka Fish Sanctuary.
Neiliang u R. Lytan da ong u wa sñiawkmen u wa ka chnong Khatkasla man ko kawi ka wow lai chakhmat heiyatoh waka Fish Sanctuary kamjooh wow pynneh ya ki dohum, heijooh i por ong u wa daw poi i por wow khriñ ya ki paidbah wow wan wow pait-ke ki ya kani ka thaw heijooh i por wow man ko leh kam ka Tourist Spot wei u man ko leh ka laad kamai ya ka chnong ka thaw hi waroh kawi.
U B. Shylla won da ong u wa sñiawsuk wow yoh u ya krehlang wa ki waheh yong ka chnong Khatkasla wa man ki ki bru wa sñiawthooh wei kiwa chynna jngai heiyatoh wa i khooid i jngiar yong ka wah wei kammon u pynneh pynsah ya ki dohum ki dathli wa kiwi tawon kiwa im hapoh ka um.
Da ong u leh iwa emkaam dooh toh u pynneh ya ki dakha kiwa em ha kani ka thaw kiwa man ki dakha tre chnong kiwa ong ki dakha Myntang wei ym emkaam u rah na kiwi tawon ki thaw wei iwa emkaam toh u pynneh ya ki yong i hi ki jait dakha, kamtæ da emkaam u booh da ki Signboard wei heijooh i por ki maham wym hoi de u leh jaklia næ u khwe næ u leh khlemakor heiyatoh wa kani ka thaw wa da em ki doh um, wei da ong u wa ka mynsien khwan man ko i dooh nong ya ka pateiñ ka wow wan.
Chooh chooh da ong u wa neiliang ka chnat ye hi ki u yarap kam ki kynja Scheme lada dam ka um u yillu wei i yillu yong katu ka wah toh u pynchna pyn da ki moo wa ki khyndaw kiwa em ha ka wah hi, kamtæ da ong u wa i kaamram yong kiwa chong chnong iwa hakhmat tam toh u ya krehlang khnang wow miat u bha kani ka Fish Sanctuary.
Discussion about this post