U Chief Electoral Officer ka Meghalaya, u FR Kharkongor, ynnin da wan wai u ya i pynsñiawthooh hajrong ka kor EVM (Electronic Voting Machine)/VVPAT (Voter Verifiable Paper Audit Trial) ha yung krehkaam u Deputy Commissioner, East Jaiñtia Hills District, Khliehriat hei emlang u T. Lyngwa u Secretary ka sorkar Meghalaya wa Electoral Roll Observer ka East Jaiñtia Hills District, u A. Baranwal, Deputy Commissioner wa kiwi kiwi.
U FR Kharkongor, hawa e yei klam da ong u wa kani toh ka sien wa nyngkong wow pynsñiawthooh hajrong ka EVM/VVPAT ha Meghalaya, wei da em leh ki pynsñiawthooh ha kiwi ki District chwa ka Election 2023, deiwa pyntip leh wa em chiboon ki kaam wa ka Election Commission of India (ECI) kwah ko wow leh.
Da khana u wa heipor wa sdang nyngkong ya ki kor EVM (Electronic Voting Machine) ha u 2018 da em i artatien hapyrdi ki paidbah wei neiliang ka Election Commission of India da pynjanai ko ya i rukom krehkaam ki kor EVM deiwa booh lang wa ki VVPAT wei katni da chna ya ki ha i rukom wa janai khlem em wa ye u pynemkaam bakla ya ki.
Da batai u leh ya ki le bynta ka EVM wa kynthup ya ka Ballot Unit, ka Control Unit wa ka VVPAT deiwa kyntu u leh ya kiwa chah hikai wow chim kabu ki yeini i chah hikai wow pynsñiawthooh ya kiwi tawon khnang wow em ki i chaniah ya i rukom krehkaam kini ki kor.
Neiliang u Deputy Commissioner ka East Jaiñtia Hills District, u. A. Baranwal,da ong u wa ki kor EVM/ VVPAT toh ki thong yong i jop ha ki kaam synchaar paidbah khnang wa i chakri paidbah u man iwa che kdar wei iwa khooid.
Da kyntu u leh ya ki paidbah wow jied ki katkam i hok ya kiwa mihkhmat katkam wa kwah ki ymtoh dei chah pynbor.
Chooh chooh da kyrmen skem u wa lyngba kam kini ki pynsñiawthooh daw ye u pynpsiah ha i thij i pyrkhat ki bru heiyatoh wa ki hok ki wei dang emkaam chooh wow pynsñiawthooh chooh chooh heiyatoh wa ki rukom krehkaam ki kor EVM/VVPAT.
Ha kani ka sngi neiliang u FR Kharkongor, da yaklam u leh wa u Deputy Commissioner, u Superintendent of Police, ki Zonal Magistrate wa ki Sector Officer ka District wow booddien hajrong i rukom pynkhreh ya ka Election 2023.
