Ha ka District Level Youth Exchange Program wa ar sngi hajrong ka phang “Today’s Youth, Tomorrow’s Leader” wa pynman da ka yung krehkaam u District Sports Officer, West Jaiñtia Hills District da sdang ya ka ynne ka sngi ha Auditorium ka Kiang Nangbah Govt. College, Jowai, deiwa wan chimbynta 10 tylli ki skur wa kynthuplang ki College ka West Jaiñtia Hills ha ki jait yakob waphær waphær.
U District Sports Officer uwa man leh u Asst. Director ka Sports and Youth Affairs ka sorkar jylla, u Khroobok Passah hawa klam yahkhmat ong u, kawa kam kani ka rynsan da man ka sien wa le wa da pynman ya ka, wei ka thong hi toh yow pynchlur ya ki khynroo khyllood puræ u pynyoo ki yei sap, wei saam kylliang leh yei stat i tip.
Da ong u leh lyngba kani ka Youth Exchange Program da yoo wa wanrah ko boon i myntoi, wei kiwa jop na kani ka District Level u lai chimbynta ki ha ka State Level ka wow man haka tayaaw wa nyngkong u Khonchonglad (Nov), neitæ won kiwa jop ha ka State u lai chimbynta ki ha ka National Level.
Ha kani ka sngi nyngkong, ki jait yakob wa da pynman kynthup ka Solo Folk Song, Solo Folk Dance, Group Solo Folk Dance wa Solo Folk Song.
Da em leh i pynsñiawthooh cha ki khynroo khyllood hajrong ka Skill Development wa da wan wow pynche da u Lambormi Suchen, Skill Development Officer ka West Jaiñtia Hills.
Mynstep kawa man ka sngi wa ar won daw em ka yakob dro dur, ka yakob leh Quiz, thoh Poetry, thoh parom neitæ ka Science Mela wa kiwi kiwi de.
Discussion about this post