Deilang wa ka ri waroh kawi, ka West Jaiñtia Hills District leh da lehkmen ko ya ka lyngkhooh snem wa 75 i yoh laitlooid ka ri dei mynsien wa chongchit wa deiwa phooh wa phieñ.
Ya kani ka lehkmen da wan wow sakhi da kiwa boon ki bru paidbah ha madan Jrisalieñ, Chutwakhu, Jowai heiwa u Montri ka chnat Transport, u Dasakhiatbha Lamare da wan u wow pynhær ya ka lama wei da chim u leh ya ka salam Rashtriya Salute ya 32 tylli ki dhab wa kynthup ya ka District Police Force, NCC Cadets kiwa na H.K. Singh Memorial Secondary School (Junior Division), Government Boys Higher Secondary School, Government Girls Higher Secondary School, Meghalaya Bharat Guides deilang wa 27 tylli ki skur hei yahkhmat u Parade Commander Inspector Sunday Manner wa u Second in Command S.I. Hamran Sayoo.
U Dasakhait hawa e yei klam da khana u ya ki kaam pynroi wa da wanrah da ka sorkar hapoh ka jylla wei da e khublei sngi laitlooid u leh ya waroh kiwa chong chnong.
U Montri da saam u leh ya ki khusnaam ya kiwa jop ha ka March Past heiwa da yoh nyngkong da ka Q.C Springside Higher Secondary School, wa ar ka Police Public Secondary School wei wa le da yoh ka Little Flowers Secondary School.
Neiliang u Deputy Commissioner, u Garod LSN Dykes da saam u leh ya ki Certificate cha waroh kiwa chimbynta nadooh ki skur, ki dong kiwa da e ya ki rwai ki chaad wa pynyoo yei mynsien maya ri.
Ha Amlarem (Civil) Sub-Division da lehkmen ya kani ka sngi ha Amlarem Sub-Division Sports Association Mini Stadium, Ladjaplem heiwa u Montri ka chnat Puræ Puthi, u Lakhmen Rymbui da pynhær u ya ka lama ka ri wei da chim u leh ya ka salam Rastriya Salute ya ki 6 tylli ki dhab wa kynthup kawi ka yong ki pulit wa 5 tylli ki skur.
U Montri da saam u leh ya ki khusnaam cha kiwa jop ha ka March Past wa da yoh da ka K Syiem Jingsuk Higher Secondary School, wa ar ka Mang Hai Ryum Secondary School wa le ka Riwar Jaintia Church of God Secondary School.
Da pynkupburom leh ya ki khynnah wa lehbha ha ka SSLC wa HSSLC Exam 2022 wei da yoh leh yei pynwyrngia da ki rwai ki chaad.
Ha Hima Shangpung da lehkmen ya kani ka sngi ha madan Hula Moosyiem, Shangpung heiwa u MLA ka thaaiñ, u Comingone Ymbom da pynhær u ya ka lama.
Ki paidbah leh kam chibynta ini i lehkmen dap 75 snem ka ri kawa da e pyrtuid ka Azadi Ka Amrit Mohatsav da pynchlur leh kiwa chong chnong ka ri wow pynhær ya ka lama ka ri ha ki yung ki sem ki heiwa da krehlang kiwa boon wow pynhær ya ka lama ka ri ha ki yung ki sem yong ki.
