Ka Lympung wa 29 ka Seiñ Kyntu Seiñ Raij 12 Daloi chirup i ya krehlang wa ka Seiñ Raij Nongtalang, ha uni u snem 2026 da sdang ko nadooh ka 24 tarik wei da pynkut ka haka 25 tarik u January 2026, deiwa wan sakhi da ki phaw hajar ngut ki paidbah ki khon ka Bri Ynñiawtrep Ynñiawskum ha chnong Nongtalang.
Ha kani ka Lympung da wan chimbynta da kiwa boon ki Raij wa ki khon ki Seiñ Raij waphær waphær ka ri 12 Daloi, wei da em leh ki waheh khroo pyrkhat wa e yei klam phang ha kani ka sngi.
Ya ka Lympung da sdang deiwa yoh i kyntien waiphang na u President SKSR 12 Daloi, u Wh. Wom Chyrmang, wei wa da pynlai ya kani ka Lympung da u Wh. Juwan Lamin wa u khynroo Sikil Chyrmang, da yoh leh ki kyntien ngooh kyntien dem Blai chwa wow sdang da u Wh. Harvis Phawa, uwa man u Chairman ka Arts & Culture SKSR 12 Daloi.
Kamjooh da yoh leh i kyntien snieñ na u Wh. Hammarsing Kharhmar, Chairman ka Arts & Culture ka Sengkhihlang hajrong ka phang “Ka put ka tem ka long ka maian Niam Tynrai”, u Wh. Pet Dhar, Secretary ka Raij Nangbah uwa da klam hajrong ka phang “Ki jingkordor ka Niam Khasi”, u Wh. Moses Lyngdoh kam u Langdoh ka Raij Diengshynrum da klam u hajrong ka phang “Ka riti synshar khadar u khun Hynniew Trep”.
Da yoh ya ki kyntien e khublei na u Wh. Ni O Phawa, dkhot ka seiñ.
Ya kani ka Lympung da pynkut ka deiwa pynhiar ya ka lama ka seiñ da u Wh. Chui Pohlynjar uwa man kam u Pa Daloi Elaka Nongtalang.
Ha kani ka Lympung da yoh haroh wow saam ya ki Prize cha kiwa jop ha ka Quiz Competition, kamjooh i pynkup burom ya kiwa yahkhmat seiñ kam ya u Wh. Lakhon Biam na ka Seiñ Raij Nangbah kam u Convener (Founder) ka SKSR 12 Daloi, ya u Markus Shylla, Seiñ Raij Chnong Pamrakmai uwa poi chakhmat hei puræ puthi, ya u Wh. Heibormi Sungoh kam u Secretary warim bha uwa pynman yei sdang ya ka Lympung ka SKSR12 Doloi na Umladkur.
Ya kani ka Lympung da wan sakhilang da u MLA ka thaaiñ, u Lahkmen Rymbui kam u Montri ka sorkar Meghalaya, wei da pynkup burom leh ya oo yei lehbha u ya ka Constituency kamjooh lyngba i e mynsien wei yarap u wow pynman ya kani ka Lympung kawa jop.
Da wan leh wow sakhilang u Deputy CEM ka JHADC, u Lasky Rymbai, kamjooh leh u Wh. Robin Kurbah, President ka Sengkhihlang, u Wh. Mario Biam, Secretary ka Sengkhihlang chirup ki waheh wasian, ki manbei manpa ka Bri u Ynñiawtrep Ynñiawskum.
Ka SKSR 12 Daloi da dap ko dei sñiawngooh khamtam ya ka Seiñ Raij Nongtalang nadooh ki President, Secretary, u Langdoh ryngkat kiwa yahkhmat ka Raij Nongtalang kamjooh ya u Pa Daloi ka Elaka Nongtalang uwa da kreh chitom met wei mynsien nadooh u pynmiat dur bha ya u Moobynna Sahnaam wa klam bru sakhiat hadooh kattæ kattæ wa kiwi kiwi ki kaam ha kani ka Lympung. Da sñiawsngooh chooh chooh ya ki chnat sorkar kam ka PHE, PWD, MeECL, Health, Fire Service, Police wa kiwi de.
Neiliang ka Seiñ SKSR 12 Daloi paan maap ko lada em kiwon kiwon kiwa mylliñ ki wym joh wym jam lada toh ki bru samen namo ki chnat sorkar leh kamjooh.
Lyngba kani ka Wyrta ka chula hei pyrtuid ka SKSR 12-Doloi e ko i kitbok kitrwiang cha waroh kiwa ya embynta wow yarap yataan, u pyntoh pyntne u pynphooh pynphieñ ya kani ka Lympung heiwa da man ko kawa jop, heijooh i por e wa lyngba kani ka Lympung u wanrah ko i yatylli, i maya, i krehlang, i ya maap markylliang neibynta u im ka ri waka jaitbru.
Im ka niam im ka jaitbru pynkut ka Wyrta na u Wh. Meliyoo Lyngdoh, Publicity Secretary ka seiñ.
Discussion about this post