Ka Jowai Presbyterian Higher Secondary School ynne ka sngi da pynkut ko yei lehkmen dap 25 snem i lai luti yong ka hei wow e i chakri lyngba i stat i tip, ha ka yalang wa da pynman ha Jubilee Hall ka Balang Presbyterian Jowai heiwa da wan sakhilang da u MP ka Rajya Sabha u Dr. W.R. Kharlukhi kam u kongsan, u MLA ka Jowai, u Wailadmiki Shylla kam u symbood kongsan hei emlang u Dolloi ka Elaka Jowai, u Puramon Kynjing, ki Pastor wa kynthup ya u Rev. E. Nongpluh, u Rev. B.B. Lamin, u Rev. C.L. Laloo, ki tymmen wasan, kiwa sikai, ki khynnah skur warim wa kiwa dang puræ neitæ kiwa chah khut sñiawbha wa kiwi de.
U Wailadmiki Shylla hawa klam da yaroh u ya ki bor pynlai wa ye kani ka skur u kaap ya 25 tylli ki snem neibhah wow pynlai ya ka skur ymtoh i kaam wa suk, deiwa ong leh wot da ka sorkar leh dang chem saja ko.
Tæ kamwa ka skur da pynsñiaw ko leh yei emkaam wa dang dawa ha kani ka skur lyngba ki dorkhat wa da e kti ko ha oo kamjooh ha u MP, neiliang yong oo da kular u wa katwa ye wa lah daw pyrchang pynyoh u yeiwa emkaam yong ki ha chirup i yakrehlang wa u MP.
Kyntu u leh ya kiwa sikai kamjooh ki khynnah skur wow man kiwa kreh chitom khnang yow mih chiboon kiwa stat wa chemphang ha ki laiñ waphær waphær.
Da pynkynmoo haroh u heiyatoh wa i angnood kiwa yahkhmat ka Balang Jowai Presbyterian wow pynneh pynsah yei dur wa i man kyrpang kani ka yungmane kamwa da booh da chna nadooh warim, kamtæ da ong u wa neiliang yong oo dadep kyrpaad u ya ka sorkar wow pynpsiah ha ka Swadesh Darshan Scheme kawa man ka Scheme neibynta u pynneh pynsah ya ki thaw mane, kam iwa da yoh ka Seiñraij Jowai neibynta u pynmiat pynbha ya ka Aitnar, wei kamwa da yoh leh haka Balang Nongsawlia Presbyterian ha Sohra wa kiwi de.
Neiliang u kongsan, u Dr. W.R. Kharlukhi hawa klam ong u, ini i dap 25 snem ka skur pynkynmoo ko ya oo heiyatoh i dap 175 snem i wan ka ktien u Blai ha kani ka Ri Khasi Jaiñtia, wei i dap 175 snem ka Balang wym toh u lehkmen du ya ki snem wa dadep tangwa u kynmoo leh wa u Blai da jied u ya ka ri waka jaitbru yong i wow man ka yong oo.
Ong haroh u wa u Blai maya bha u ya ki jaitbru yong i neibhah lada wyrchaw wa i jia ha kylleiñ ki jylla ka ri waka pyrthai kamjooh, boon iwa lait i na iwon iwon i jia.
Neitæ i yoh kani ka skur u kaap cha u moomer dap 25 leh toh wa u Blai uwa da e i yei chakri emlang bait u chirup.
Kamtæ khut kyntu kyrsu u ya ki khynnah skur wow e kti ki yei im yong ki how Blai neibhah oo wa tip lut ya waroh.
Ha kani ka sngi da wai leh ya u moo sahnaam yong i lehkmen dap 25 snem ka skur, kamjooh u moo sahnaam wa yoh yarap ka skur na u Dr. W.R. Kharlukhi lyngba ka MPLADS Scheme 2024 neibynta i chna kamra kani ka skur.
Neitæ da yoh i khana yei parom tbian ka skur na ka Principal ka I. Lytan, i pynlait yaka Souvenir yong ka skur da u Rev. E. Nongpluh wa i pynhær Balloon da u Tbn. B.N.Lamare.
Da pynchongchit chooh chooh ya kani ka sngi da i chaad i rwai, i lehke Drama tbian wa da chimbynta da ki khynnah skur, kiwa sikai wa kiwi.
Discussion about this post