Haka 5 tarik uni u bnai, neiliang yong ka DC (Supply) East Khasi Hills District da phah ko ya u sahep yong ka chnat wow wan takit hajrong i wiar u khoo ha ka chnong Laitnongkseh kawa haap ha ka Sohïong C&RD Block uwa da mang da ka sorkar na ka Scheme PMGKAY kiwa haap ha ka thup AAY wow yarap ya ki paidbah ha ini i por wa em ka khlam COVID-19.
Ha kani ka sngi da emlang leh kawa saam khoo ka Trabilin Nongbri wa u Balumbok Nongbri uwa da mihkhmat heithaw yong ka, u Waheh Chnong, Secretary chnong, ki dkhot yong ka Vigilance Committee Laitnongkseh, ki dkhot yong ka HYC Nongkseh Unit kamjooh leh ki bru kiwa yoh myntoi kiwa haap ha ka AAY.
Hadien wa da takit wei da pynche na u sahep, ka HYC da ong ko wa da che wa neiliang yong ka yung krehkaam yong ka DC (Supply) East Khasi Hills wa da dep wow pynlait ya u khoo na ka Scheme PMGKAY cha katai ka chnong nadooh u Naitung (April), 2020 kiwa haap ha ka thup AAY wa PHH kawa da mang wow saam 5 kilo chi khlieh bru uwa ym emkaam wow su poisa. Chooh chooh ka seiñ da kam ko leh wa kawa saam khoo (Dealer) da murieh ko ya u khoo nadooh utai u bnai da iwa e daw wa ka DC (Supply) ym em phah ya ka wow saam ya u khoo cha kiwa haap ha katai ka thup AAY neibhah kiwa yoh myntoi na ka AAY ym em e ki ya u Aadhar Card wa kiwi kiwi. Tangwa neiliang yong u sahep wa wan na ka DC (Supply) da pyntip u wa ym em kam itæ i phah wym toh u saam khoo cha kiwa ym pu em e ya u Aadhar Card.
Neiliang yong ki paidbah leh kiwa yoh myntoi na ka Scheme PMGKAY kiwa haap ha ka thup AAY da pyntip ki wa ym yoh ki ya u khoo kamwa da mang da ka sorkar 5 kilo chi khlieh, tangwa da yoh bait ki 5 kilo chi card nadooh u April, 2020.
Neiliang yong ki dkhot yong ka Vigilance Committee leh da pyntip ki wa kawa saam khoo yong ka sorkar da pynlait khoo bait ko du 5 kilo chi Card.
Kamtæ hajrong ini i pynwiar wei murieh ya u khoo wa da mang kyrpang da ka sorkar cha kiwa dooh wa duk ha katai ka chnong, neiliang yong ka HYC Nongkseh Unit da beiñ joor ko ya kawa saam khoo.
Ka seiñ da kyntu joor ko ya ka sorkar lyngba ka DC (Supply) East Khasi Hills wow pynchitom ya kiwa emkti ha ini i kaam iwa deiwa leh ya ini da pyndooh ko yei hok yong kiwa dooh wa duk.
