U Vipin uwa man kam u payu u Raja Raghuwanshi, dapoi u ha Shillong yow dawa yei hok u diah u uwa da chah pynyap wei yow yoh leh ya ka Death Certificate u Raja. Da kwah u leh wow pait ya ka Post-Mortem Report yow sñiawthooh kammon da chah pynyap u Raja.
U Vipin da pyntip u leh wa daw lai booh mukotduma u ha ka Meghalaya High Court myntu yow pyrchah yei e jamin ya kiwon kiwon kiwa emkti wow pynyap ya u Raja Raghuwanshi. Da pynsñiaw u leh yei sñiawsih yei yoh jamin ki le ngut kitæ u Lokendra Tomar (u tre yung wa sah ka Sonam ha Indore), u Balbir uwa man kam u Security Guard wa uwa pynyoh yung wai ya ka Sonam, u Shilom James. Katkam wa ong u Vipin wa i pynlait ya kini ki le ngut da wanrah ko yei pisa langa ya ki kam ka yung ka sem.
Da ong u wa hanla da che kdar wa emkti u Shilom James wow murieh wow pynsih ya ki sabut, kattæ leh dang yoh jamin u wei yeini leh daw rah u hapoh ka yung bichaar.
U Vipin da pynbaad u ya u payu ka Sonam, u Govind deiwa ong, “U Govind da chet kylla u yei chaniah ki oo neibhah ha kawi ka liang da ong u wa kwah u wow chah pynchitom ka Sonam katkam ka aiñ tangwa ha iwi won i liang u Govind da wan u cha Shillong dei rieh yow thung muktiar neibynta ka Sonam wa u Raja Kushwaha wei ini da pynmong ko ya i kam ka yung ka sem.”
Da ong u leh, “Ka yung yong ka Sonam da thok ki i hei dur i chong kurim tangwa u Govind kattæ da pteiñ u wow pynchitom i deiwa kreh pyrchah ya i deiwa murieh.”
U Vipin da ong u leh wa daw lai u cha Sohra yow lai pait yei thaw wa chah pynyap u diah u wei daw pynman leh yei duwai Blai neibynta i mynsien u Raja. Da pynsñiaw u leh yei sñiawngooh ya kiwa chong chnong ka Sohra yei yarap ki wow chem yeiwa jia sakhiat wei da kyntu u na ki wow e chooh ki yei kyrchaan yow yoh yei hok u Raja.
Discussion about this post