Jowai : Ka Meghalaya PWD Muster Roll Worker Union, Jaiñtia Hills District, Jowai hei ya krehlang wa ka Jowai Urban Bank Co-operative Ltd Jowai, lyngba u Bibamos Tang, Secretary ka Bank, da pynman ki ynne ka sngi ya ka wai Bank Account wa kyrpang neibynta ki Muster Roll kiwa em ha ka office AEE PWD (Rds) Shangpung Sub Division ha IB PWD Shangpung.
Ka kong R. Passah ka EM ka seiñ wa u K. Lamsalanki Pariat Adviser ka Seiñ Muster Roll da pynche ki ya i emkaam u em ki Bank Account neibynta i suk i saiñ i yohnong kiwa kreh Muster Roll, da pyntip leh wa ya ki khon ki pyrsa yong ki Muster Roll kiwa yoh 50% ha i puræ puthi i yong ki, kamjooh ya kiwi tawan ki myntoi na ka Sorkar Jylla Meghalaya lyngba ka Ministry of Labour Govt. of India u wan noh ki cha ki bank account nadooh u bnai nyngkong u snem thymme.
Ha kani ka yalang wa da yoh leh ya i klam na u Wompher Nartiang, uwa mihkhmat ya ka JUBCo Ltd, heiwa da pynche u hei yatoh wa ka Bank wa ki paidbah khamtam ha kini ki por ka sorkar da pynchlur ko ya ki paidbah yow pyllang poisa ki ha ki bank kiwa da tipmit da ka RBI, kamjooh da khana u ya ki jait yarap poisa ka bank ya kiwa sdang u khih da ki khih kiwa khian wa kiwi kiwi.
Da yoh leh ya i klam na u Biang Shylla u Chairman ka Elaka Shangpung heiwa da kyrpaad u ya ki bank wa ki seiñ wow pynchlur ki ya kiwa kreh chispah sngi MGNERGA wa kiwi kiwi ki bru kiwa yoh nongsngi na ka sorkar wow wai ki ya ka account ha ki Bank kiwa tipmit da ka sorkar.
Ha kani ka sngi da wai bank account ha ka JUBCo. Ltd hadooh kamwa 87 tylli lyngba ka scheme No Frill Account.
Ya kani kajooh ka yalang wai account neibynta ki Muster Roll, daw pynman leh ha waroh ki CRD Block yong ka East, West Jaiñtia Hills District.
Discussion about this post