Ka President ka ri India, ka Droupadi Murmu ynne da wai ko yaka 5th Meghalaya Games ha PA Sangma Stadium wa em ha Tura, West Garo Hills deiwa emlang u Lat ka Meghalaya, u Phagu Chauhan, u Montri Rangbah, u Conrad K Sangma, ka Agatha Sangma, MP neitæ u Lamphang, u Thomas A Sangma, u Montri ka chnat puræ puthi, u Rakkam Sangma, u Montri ka chnat Sports & Youth Affairs, u Shakliar Warjri, u Montri ka chnat PHE, u Marcuise N. Marak, u Montri ka chnat bordiñ, u AT Mondal deilang wa kiwi de ki Montri wa ki sahep ka sorkar.
Kani ka Meghalaya Games ha kani ka kynti toh ka sien wa nyngkong wa pynman ka ha Tura, hei sien wa nyngkong wa pynman leh ya ki yalehke tynre wei i sien nyngkong wa da wan da ka President ka ri wow wai ka.
Ka President hawa e yei klam da ong ko wa ka thaaiñ North East India toh kiwa em yei sap ha ki kaam Sports wei da ban joor ko yei emkaam wow pynneh pynsah ya ki yalehke tynre.
“I boon ki jaitbru toh i miatdur ka ri India wei toh u pynemkaam yeini yow pynkhlan ya ka ri ha ki kaam yalehke, wei da emkaam bha wow kyrchaan ya ki jaitbru ri-loom wow man ki kam ki khloor yalehke. Sñiawkmen O leh wow yoo wa kiwa boon kiwa chong chnong ka North East da chim ki ya ki kaam yalehke kam ki laad kamai wei kani ka thaaiñ da pynmih ko leh boon kiwa yalehke wa pawnaam khamtam ki kynthai,” da ong ka President.
Ka President hadien wa dep u klam da wan biang ko chakhmat wow e khublei ya kiwa chimbynta wa da yang ki 3 kynta chwa wow wai ya kani ka lympung deiwa sap da ki sula tbian kti ha kani ka janmiet wa kjam.
Waroh kiwa da chimbynta da em ki awjan 3000 ngut kiwa daw chimbynta ha ki 23 tylli ki jait yalehke ha ki 16 tylli ki thaw yalehke.
Discussion about this post