U M. Andrew Passah deilang wa ka kurim u ka Wanedora Laloo ha ka janmiet ka 4 tarik uni u bnai i dapoi luti ki wow wai paidbah ha dong Moosalyngkat ya ka thaw sait that sait nep næ ki sula wa boonjait kawa man katkam i yah ka juk ka por kawa tip kam ka A&W Laundry Lounge.
Ha ka yalang wa tbian yong kani ka janmiet hei pynlai u M. Andrew Passah hei sakhilang ki hayung hasem wa ki lok ki jor chirup i emlang ki ar ngut ki manbei ka Ri-loom Jaintia ka Meriba Sumer wa ka Padma Shri Awardee, ka Trinity Saioo, neiliang u Rev. C. Laloo da pynkyntang u ya kani ka por da ki kyntien duwai.
Ka Meriba Sumer kam ka manbei wa yieñ ha ki kjat yong ka dahi wow sdang ya ka dukan chet baam watip kam ka Sushu Pabe Bakery da e mynsien ko ya u Andrew deiwa ong, yaleh u pynyajan yajooh wa ki paidbah, yaleh u pyntipmit ya ka dukan dukdoh lyngba ki laad pathai yong kani ka juk neitæ man leh uwa yaichah.
Ka Trinity Saioo hei e kyntien kam ka kongsan yong kani ka janmiet da ong ko man iwa sñiawsuk u yoo wa ka jaitbru yong i daman ko kawa lai chakhmat wei da kyrsu kyntu ko leh deiwa ong ham e laad wa ka nongmuna wa yoh i u yoo ha ki Datham wow im deitæ i mynsien adnood bichni wow yatan bait chatre kawi ya kawi iwa mut ym em mynsien i wow ya kyntu kynrong para i.
U M. Andrew Passah hawa e yei klam da khanna u wa kam u bru wa jooh im u khih u kreh ha ki ri sepsngi yong ka thaaiñ Europe da pyrkhat u hawa wan cha chnong yi u leh neibynta i suk wei myntoi yong ki bru wa chong chnong kamtæ dawan hei pyrkhat yong oo wow wanrah ya kani ka kor saithat yong kani ka juk stat wa thymme watip kam ka Wet Cleaning (Eco Friendly Alternative for Dry Cleaning).
Chooh chooh da ong u wa kani ka kor toh kawa da wanrah na ri America wa ya ki dawai wow sait ya ki that da phah na Germany wei ki wym ktah yei chait i khiah ki bru næ ki tngit wa mih na ki that ymtoh kiwa pynsih yei man ka rymaw wei katwa ye u pyrchang kani ka dukan yong oo u e i chakri wa bha tam ya ki bru wa wan ha kani ka A&W Laundry Lounge.
