Ka 4th Meghalaya Games 2022 da wai pyrda ya ka ynne ka sngi da u Montri Rangbah ka jylla, u Conrad K Sangma ha ka yalang wa pynman ha ka SSA Stadium, First Ground ha Shillong.
U Conrad da e khublei u ya ka Meghalaya State Olympic Association kawa da ya krehlang waka chnat Sports & Youth Affairs yow pynman ya kani ka lympung kawa em 19 tylli ki jait yalehke wei da em kamwa 2,500 ngut kiwa wan chimbynta.
Da pynbna u leh wa ha u snem 2023 daw pynman ya ka ha Tura katwa ha u 2024 daw pynman ha Jowai. Ini da wanrah ko yei thap kti na kiwa da emlang hadien wa da pynbna wa ka Meghalaya Games daw pynman noh ya ka man-u-snem.
Ya ini da ong u wa da leh yow pynku ya ki kaam yalehke kamjooh leh yow ye u pynbiang ya ki thaw yalehke ha kylleiñ ka jylla.
“Kani ka lympung da man ko kam kawi na ki lehkmen yei dap 50 snem ka jylla wei da man ko leh dang ka sien wa soo donhi wa da pynman ya ka Meghalaya Games wei ka sien wa ar ha ki soo snem wa da dep,” da ong u Conrad. Ya ka Meghalaya Games da pynim biang da ka sorkar jylla ha u 2020 heiwa u Conrad da ong u wa ini pynyoo ko yei thong ka sorkar kawa pynyoo yei thrang wow pynku ya ki kaam yalehke Sports khamtam neibynta ki khynroo khyllood ka jylla.
Da ong u leh wa ki khynroo khyllood kiwa em hapoh 25 snem da em ki 22 lak ngut hapoh ka jylla, kamtæ da emkaam wow e ya ki ki laad ki luti wow leh ki yeiwa maya ki yow ye ki wow pynyoo yei sap yong ki.
Kiwa de kiwa da emlang ha kani ka sngi toh u Sports & Youth Affairs Minister, u Banteidor Lyngdoh, uwa jooh man leh kam u President warim ka Meghalaya State Olympic Association wa u MLA ka Mawphlang, u Eugeneson Lyngdoh.
“I da yachem i wa u Montri Rangbah yow pynim biang ya ka Meghalaya Games chwa u 2020 hapoh i por ka sorkar MDA neibhah wa da yoo wa kwah bha ki wow pynchlur ya ki yalehke Sports,” da khana u Banteidor.
Da khana u leh yei daw wa chem chitom wow pynyoh thaw sah ya kiwa yalehke neidaw wa dang pynchna ya ka JN Sports Complex kamtæ da duna thaw sah.
