Jowai: Ka skur Marianhill Higher Secondary School Jowai, kawa da seiñ nadooh u snem 1960 hajrong ka yurim wow e yei stat i tip ya kiwa dooh ha ka imlang sahlang, ynne ka sngi da wai pyrda ya i lehkmen dap 60 snem pura i lai luti yong ka kawa tip leh kam ka Diamond Jubilee.
Ya kani ka yalang da pynman ha pchem ka skur wei da wan sakhi ya ka nadooh ki khynnah skur warim, kiwa skai, ki Father wa Sister wa kiwi kiwi.
Nadooh wa sdang ya ka, ka skur da kreh chitom ko wow pynku ya i man i long i man hapoh i yahkhmat u (L) Fr. Tognocchi uwa da chna ya ka yung skur, katwa u (L) Fr. Henry Fantin, won da wanrah u iwi na i chynna jngai ka yung-mane ha kani hi ka thaw heipor wa dang duna bha ki skur hapoh ka sor Jowai.
Hajrong i lai luti ka skur, kiwa pynlai ymem mylliñ ki ya waroh kiwa da emkti wow pynku ya ka skur nadooh kiwa sikai, kiwa rahnaam ya ka skur ha ki kyrdan puræ wa yalehke.
U Vincent H Pala MP ka Shillong, da wan wai u ya kani ka lehkmen heiwa da pynsñiaw u yei mynsien wa sarong wa kani ka skur da ku bha ko chaphrang ha kiwa boon ki liang da i krehlang yong waroh khamtam ki manbei manpa ki khynnah ka skur, wei da kyrmen u wa ini i sdang lehkmen dap 60 snem u man i kyrkhu ya ka skur waroh kawi.
Da ong u wa ki bru im ki ha pyrthai deiwa kdong yei stat i tip katwa kamtæ ymtoh u pynlut por du hei puræ kot tangwa emkaam wa ki bei ki pa u pait wei wow pynchlur ki ya ki khon yong ki wow chimbynta ha ki yakob waphær waphær ym du hei puræ puthi.
Sa kawi tawon ka phang wa da klam u toh ya ka akor ka burom ha ka imlang sahlang wa emkaam tam deiwa kyntu ya ki khynnah wow rah ya i burom yong ki dahi, i burom ka yung ka sem, ka jaitbru wa ka ri waroh kawi.
Ha kani ka sngi da yoh leh i klam na ka Joint Director DSEO, ka D. Khongiong, u Rev. Fr. L. Paswet Principal ka Marian Hills Higher Secondary School Jowai, u Fr H.Lamare (Vicar General, Jowai Diocese) u Additional Deputy Commisioner ka West Jaiñtia Hills, u P.K.Boro wa kiwi kiwi.
Ha kani ka sngi da pynkup burom leh ya u Kyrmen Hemiat Rymbui uwa da wan chakhmat ha ka SSLC uni u snem, wei da pynphooh ya ka sngi da ki rwai ki chaad wa kiwi kiwi wa da pynkhreh da ki khynnah ka skur.
Discussion about this post