Jowai: U Conrad Sangma MP ka Tura, ynnin ka sngi da wai paidbah u ya i dur mot sahnaam u (L) Akbar Khonglah ha ka chnong Sohkha Mission, West Jaintia Hills District kam ka dak wow pynsah naam ya oo, uwa da theh lut doh wei mynsien neibynta ka puræ puthi wa ka roi ka paar hapoh ka thaiñ War Jaintia.
U Akbar da sdang u ya ka Sohkha Proceeding High School ha u snem 1959 kawa da tip katni kam ka Sohkha Govt. Higher Secondary School nalor kiwi tawan ki skur ha ki chnong wa em marjan kawa da wai laad ya waroh kiwa chong chnong u yoh ki yei stad i tip.
Ya ka yalang wai mot da pynman ha Sohkha Mission wei da pynlai ya ka yalang da u MLA ka thaiñ u Stephanson Mukhim, hei wan sakhi kiwa chong chnong, ki khynnah skur, kiwa sikai, kiwa chah khut sniawbha wa kiwi kiwi.
U kongsan, u Conrad Sangma hei klam yong oo da pynsniaw u yei sniawsuk u u yoo yeini lehwarom ya uwa seiñ skur deiwa chna ya u mot neibhah boon hi ki por ki bru jooh chna mot ki bru ya kiwa yah khmat wa khroo kam ki syiem wa kiwa em ha ka kaam seiñ hima siam wei ha kani ka kynti won da man ko ka nongmuna wa pher wa leh warom ya u bru uwa khroo uwa sniawthooh sakhiat yei emkaam ka puræ puthi kawa yei u wanrah yei kylla hapoh ka imlang sahlang.
Da ong u leh wa ki kaam wa leh u (L) Akbar toh iwa neh yanom neibhah iwa sdang u toh iwa hadooh katni dang neh i wei ka thong toh ka wym kut de.
Hawa klam won u hei yatoh ka puræ puthi hapoh ka jylla da ong u wa sniawsih u neidaw 49% ki skur wa em hapoh jylla ym em ki yung skur wa biang, 77% won kiwa sikai Primary ym pu ym pyndep ki ya ka puræ yow pynbniah wei 85% won ha ki Upper Primary. Da ong u leh wa ki khynnah wa dam skur chiteiñ por hapoh ka jylla man ko archah yeiwa man hapoh ka ri waroh ka wi.
Kiwi de kiwa klam toh u Prestone Tynsong MLA, u DC ka West Jaintia u R. Rapthap, u R.L. Tariang MLA warim ka thaiñ, kiwa hayung hasem u (L) Akbar Khonglah, ki khynnah skur warim wa kiwi.
Discussion about this post