U montri rangbah ka jylla, u Conrad K. Sangma ynne da wai u ya ka M/s Megha Feed Mill ha Haripur, Selsella Block, West Garo Hills chirup i emlang ka MLA ka Selsella, ka Ferlin C. A. Sangma, u MLA ka Phulbari, u S.G. Esmatur Mominin, MLA ka Rajabala, u Abdus Saleh wa ki sahep sorkar.
Hapoh yong ka Piggery Mission ka sorkar da yaleh ko wow pynsuk ya i eh i khor wa yatoh wa i baam sñiang ha ri-loom Garo khnang wow ye u e ya ki baam wa janai ya ki sñiang.
Ka M/s Megha Feed Mill ye ko wow pynmih hadooh 1,000 kg i baam sñiang hapoh chi kynta da ki mar wa e baam sñiang wa kynthup ya u skam, saru, wa kiwi kiwi.
Ya kani ka thaw da chna ha i lut wa T. 19.34 lak lyngba ka Piggery Mission ka sorkar jylla wa i yoh poisa T. 21 lak na ki seiñ (Society).
U Conrad hawa e yei klam da ong u wa ka sorkar u pteiñ ko wow yarap ya kiwa rep lyngba ki scheme wa boonjait.
Ha kani ka sngi da e leh ya ki cheque wa kynjoh T. 50,50,000 cha ki 60 tylli ki seiñ kiwa rep namo ki Farmer Producer Group ka Selsella Block kam chibynta yong ka Farmers’ Collectivisation for Upscaling of Production and Marketing Systems (FOCUS), ha Namabilla Kasiapara.
