Ka Wapung Secondary School kawa man ka skur kawa seiñ da ka Dorbar Chnong Wapungskur, East Jaiñtia Hills District da sdang ko u lehkmen ya ka Silver Jubilee yong ka ha ka 14 tarik uni u bnai wei daw pynkut ha u snem 2023.
Ha kani ka sngi, u James P. Kongkal Sangma, uwa man u Montri ka sorkar jylla da wan u kam u kongsan deilang wa u Phasmon Dkhar, EM ka JHADC wa u Nehlang Lyngdoh, MLA warim ka thaaiñ kam ki symbood kongsan. Da emlang leh u Dr. Sankey Shangpung, Chairman ka JHADC, u Brighstar Chrymang wa u Lakhon Dkhar kiwa man ki MDC kamjooh ki Executive Member ka JHADC, u Waheh Chnong ka Wapungskur, u H. Deolangki Dkhar, ki Waheh Chnong warim nadooh u Norly Ryngkhlem wa u Satly Ryngkhlem, kiwa yahkhmat wa ki dkhot ka Executive Committee ka chnong, wa kiwa yahkhmat wa ki dkhot yong ka SMC, u Kitborlang Nongrem, State President yong ka National People Youth Front (NPYF) ka NPP, ka Jhanika Siangshai, District President yong ka NPP Women’s Wing East Jaiñtia Hills, u Iasyllokki Lyngdoh, u Grimlang Dkhar wa kiwi kiwi kiwa yahkhmat ka NPP wa NPYF yong ka District. Ya kani ka yalang da pynlai da u Speinglang Rymbai, Chairman ka SMC heiwa da yoh leh i puræ ya ka parom wa tbian ka skur da ka Kyntilang Dkhar, Headmistress ka skur.
Da e leh ya ka dorkhat cha u kongsan wei heijooh i por ya ka Appreciation Certificate cha u symbood kongsan, u Phasmon Dkhar uwa man leh u MDC ka thaaiñ, da u Gratefulson Siangshai uwa man u Secretary ka SMC wei da yoh leh ya ka Welcome Song na ki khynnah skur.
Ka Headmistress da khana ko wa kani ka skur da seiñ ya ka da ka Dorbar Chnong Wapungskur nadooh u snem 1978 kam ka Wapung Upper Primary School wei da pynku kyrdan cha ka Secondary School ha u snem 1998. Ka sorkar jylla, lyngba ka MBOSE da e ko ya ka Opening Permission ha u snem 1999 wei da tipmit ya ka kam ka Regular School ha u snem 2015. Ha u snem 2017, ka Dorbar Chnong da pynku kyrdan ko ya kani ka skur cha ka Higher Secondary Level.
U H. Deolangki Dkhar, Waheh Chnong ka Wapungskur hei klam da pynsñiaw u yei mynsien wa kmen ya ka skur wa dap ko 25 snem hei e chakri cha ki khynnah kani ka thaaiñ. Da e u leh yei yaroh ya kiwa yahkhmat warim ka chnong kiwa da yoo jngai yei emkaam hei puræ puthi ha ka imlang sahlang kiwa da sdang ya kani ka skur nadooh u 1978 kawa sdang du kam ka Upper Primary wei da ye ko wow poi cha ka Higher Secondary katni. Chooh chooh, da ong u wa kam u Waheh Chnong daw thooh chooh u ki laad ki luti yow pyndap pynbiang wei u pynku pynbha ya kani ka skur katkam i emkaam yong ka. Da pynsñiaw u leh ha u Montri wow yarap u pynbiang yeiwa emkaam yong ka skur, khnang wa ki khynnah skur u yoh ki yei chakri wa biang tam ha kani ka skur katkam ka juk katni hei puræ puthi.
U Nehlang Lyngdoh hei klam da kyntu u ya ki khynnah skur u kreh chitom ki hei puræ puthi khnang wow poi thong ki khamtam yow man ki kam ki IAS, IPS, IFS, ki sahep sorkar wa kiwi kiwi ki kyrdan khnang wow ye u rah burom ya ka chnong, ka District waka jylla hi waroh kawi, wei heijooh i por u ye ki u chna laad neibynta i kamai kajih yong ki.
U Phasmon Dkhar da e u yei yaroh ya kiwa yahkhmat ka chnong wa ka skur kiwa e yei chakri kawa bha tam ya ka chnong hi waroh kawi wei heijooh i por ya kani ka skur. Da pynsniaw u leh wa heipor wa chah jied u kam u MDC ka thaaiñ, da yoo u chiboon i duna ha ka thaaiñ kamjooh leh ha kani ka skur wei da e u da ka Scheme cha kani ka skur ha ka wow pynbha pynbiang ya ki Classroom ki yong ka. Chooh chooh da kular u leh wow pteiñ u yei chakri wa bha wei kawa biang tam kam u MDC cha ki chnong wa ka thaaiñ hi waroh kawi.
U James kam u kongsan hawa klam, nyngkong da e khublei u ya ka SMC kawa da khut ya oo u man kam u kongsan ha kani ka sngi wa kyrpang yong ka skur. Da pynsñiaw u leh wa 25 snem man ko ka por wa jrong bha, wei heijooh i por u sdang ya ka skur man ko kawa suk bha tangwa em ki SMC ki wym ye u pynlai bait ya ka skur yong ki hadien wa sdang na ki daw wa boon, khamtam kawa emkaam bha u e kti lut hawa e yei chakri, i pynlai yumut, i por, ka poisa wa kiwi kiwi. Chooh chooh da ong u, “I ye ka chnong Wapungskur chirup waka SMC u pynlai bait ya kani ka skur la 25 snem, khamtam hawa da em palat 400 ngut ki khynnah skur katni, toh iwa hap u e yaroh wa i khublei wa khroo tam ya waroh kiwa ya embyntalang.”
Da pynsñiaw u leh wa ka skur lyngba kiwa sikai man ko ka kaam kawa khroo bha u tei yow ku ka imlang sahlang deiwa e i chakri kawa bha tam cha ki khynnah skur, khnang wow ye ki u sai yei sap wa em ki neibynta u tei ya ka mynried kawa tyrchaaiñ ha ki por ki sngi wa daw wan, heijooh i por u e ki i chakri lyngba ki jait kreh kiwa boon jait kiwa daw jied ki ha ka imlang sahlang.
U kongsan da e khublei u leh ya u Nehlang Lyngdoh uwa da e sñiawbha cha kani ka skur wow sdang ko u chna ya ka yung skur, wa ya u Phasmon Dkhar uwa da e yarap chooh chooh cha kani ka skur hadooh wa man ko kamwa man katni. Chooh chooh u James Sangma da kular u wow yaklam wa u Montri Rangbah ka jylla, u Conrad Sangma heiyatoh wow pynyoh yei yarap ya ka skur katkam ka dorkhat kawa da e ha oo.
Kiwi kiwi kiwa e yei klam ha kani ka sngi toh u Kitborlang Nongrem wa u Norly Ryngkhlem. Wei chwa wow kut ka yalang, u Aristotle Rymbai uwa man u dkhot yong ka School Managing Committee da e u ya ki kyntien khublei.
Hadien ini neiliang u kongsan da pynhær u ya ka lama wei wai ya u mooyurim wa sdang ka lehkmen Silver Jubilee, wei u symbood kongsan da wai u ya u mooyurim wow wai ya ki kamra skur namo ki Classroom kiwa da chna lyngba ki Scheme na ka JHADC.
