U Union Minister of State (I/C) ka Youth Affairs & Sports u Kiren Rijiju ynne ka sngi da wai u yaka Assam Rifles Public School (ARPS) Laitkor, Shillong kam ka Khelo India Sports School. Kamwa man kattæ da em 9 tylli ki Sports School kiwa da yoh yei mynjur hapoh ka ri heiwa na kini ki, 5 tylli toh kiwa da pynlai da ki chipai. Hapoh ka thaaiñ Northeast, ka Assam Rifles Public School toh kawa nyngkong dooh kawa da pynbna kam ka Sports School hapoh ka Khelo India Scheme.
Ka sorkar kattu daw kyrchaan poisa ko yei lutphut ya kitu kiwa em yei sap nadooh i thaw sah, i puræ puthi, ka bai lai chimbynta ha ki yakob, ka Insurance, ka bai sumaar, ki chah e sikai, ki tiar ki tar, ka tulop ki Coach, ki wakreh ha kani ka kaam wa kiwi kiwi.
I thong ka Khelo India Sports School toh wow kynthuplang ya ka puræ puthi waka yalehke Sports yow yoh ya i saiñdur wa pura. Kani ka skur leh daw yarap ko ya kitu kiwa em yei sap kiwa wan na ki thaaiñ nongkyndong kamjooh ki jaitbru ri-loom ka thaaiñ Northeast.
Yaka Assam Rifles Public School da jied kam ka Khelo India Sports School neidaw wa da em chwa ko kiwa biang nadooh ki thaw sah (Hostel), ki thaw yalehke, kamjooh ka ya krehlang chwa waka Ministry of Youth Affairs & Sports waka Ministry of Home Affairs. Ki jait yalehke kiwa da jied hapoh kani ka School toh ka Archery, Athletics wa Fencing deiwa jied ya 100 ngut mar 50 ngut ki chynrang wa ki kynthai neibynta u snem wa nyngkong.
