U MLA ka Jowai, u Wailadmiki Shylla ynne da wan u wow wai ya ka Fete ka Chutwakhu Social Welfare Local Durbar, Jowai deiwa pyn-eh-daw pyn-eh-nasib ya ka chnong wow yoh nong ko yow ye u lai chakhmat yow kyntu kyrtong ya ki kaam wa bha.
Hawa e yei klam, da yaroh u ya ka chnong deiwa ong wa man ko kam ka chnong ka wym jooh mylliñ ya ki para wa chong chnong la hei lehkmen næ hawa jia iwa sñiawsih heiwa kiwa chong chnong toh kiwa da ya mih deiwa yatylli ha iwon iwon i kaam.
Da kular u leh wow pynyoh ya ka Rs. 5 lak kawa da dep kular ya ka chnong kawa da sahteiñ neidaw wei em i thut heini heitai wow pynlait ya ka poisa tangwa da ong u wa ym slem daw yoh ya kani ka Scheme.
Da e khublei u leh ya ka chnong kawa daw lehkmen yei dap 100 snem ha u snem 2025, kamtæ da kular u wow pynchna deiwa siang psiang ya u sarok wa lai wa cha ka Indoor Hall ka chnong wei lada yoh thaw wow pynheh chooh chooh oo wei yeini u leh chwa wow lehkmen yei dap 100 snem.
Ha kani ka sngi da e yarap u leh cha ka chnong Rs. 10,000.
Hachwa ini da yoh yei klam na u Waheh Chnong, u P.W. Lyngdoh ha ka yalang wa pynlai da u Hanpaia Nongpluh uwa man kam u Chairman ka Fete Committee deiwa emlang leh kiwi kiwa chah khut sñiawbha deilang wa kiwa ksoh kaam ka chnong.
Kam wow pynkynmoo wa kani ka Fete toh kawa ar sngi itæ ka 12 wa 13 tarik heiwa myntu daw em ka Battle of the Bands deilang i pynyoo riam na ki One Start Up Jaintia Model wei mynstep won daw em ka DJ Raven kawa na Guwahati deilang wa 5 tylli kiwa kiwa tem wa put wa pawnaam kam ki Larger Than 90, ki Toxic Pony, ki Nexus, ki Disturb of Malice wa ki The Lynx.
Ha ka sngi pynkut daw pynkhle leh ya ka Lucky Draw heiwa ka 1st Prize toh ka song poisa kawa Rs. 3,00,000, ka 2nd Prize kawa Rs. 1,50,000 katwa ka 3rd Prize won Rs. 75,000.
Discussion about this post