U Prime Minister ka ri, u Narendra Modi ynne da booh u ya ki mooyurim wei da wai u leh ya ki kreh kiwa dapoi T. 2450 klur haka yalang wa da pynman ha madan Polo Shillong. Hachwa ini, u Prime Minister da lai embynta lang u haka yalang wa pynman ka North Eastern Council ha State Convention Centre, Shillong yow lehkmen yei dap 50 snem ko.
Kini ki kreh wa da wai u Modi kyntup leh ya ki 320 tylli kiwa da dep kreh wa 890 tylli kiwa dang kreh ki 4G Mobile Tower, ka Campus wa thymme ka IIM Shillong ha Umsawli, u sarok Shillong-Diengpasoh uwa daw pynsuk yow lai cha ka New Shillong wa soo tylli kiwi ki sarok kiwa ha ka jylla Meghalaya, Manipur wa Arunachal Pradesh.
U Prime Minister da wai u leh ya ka Spawn Laboratory ha Mushroom Development Center waka Integrated Beekeeping Development Centre neibynta ka Meghalaya wa 21 tylli ki Hindi Library ha Mizoram, Manipur, Tripura wa Assam.
Da booh u leh ya ki mooyurim ki 6 tylli ki sarok ki jylla Assam, Meghalaya, Manipur, Mizoram wa Tripura. Da booh u leh ya u mooyurim ka Integrated Hospitality and Convention Centre ha Tura wa ka Shillong Technology Park Phase-II.
Hawa e yei klam, u Modi da ong u wa ka Meghalaya toh kawa mahajon hei spah rymaw wa ka dustur riti wei da yoo yeini nei mynsien ki bru hawa pdiang ya kiwi. Da e khublei u leh ya kiwa chong chnong ka jylla ya kiwa boon ki kreh wa daw yoh nadooh ki sarok, ka puræ puthi, i yoh kreh yoh jam iwa daw pynku chooh chooh ya ka jylla.
Hawa e nongmuna yaka yalang wa da pynman ynne ha madanbol, u Modi da ong kamwa pynyoo Red Card hawa yalehbol, ka sorkar leh da pynyoo Red Card ko ya waroh ki moochynthut wa pynwit yow pynku pynroi ya ka thaaiñ North East. “Nadooh ki kaam baam-tooh, i chah lehbeiñ, i leh chiliang, ki kaam pynmynsoo waka Vote-Bank Politics da pynthut ki yei ku wei heh i san ka thaaiñ, wei i kreh i wow sai natre yow pyndooh ya waroh kini ki kaam wa sih,” da ong u. Heijooh i por da ong u wa kini ki kaam wa sih toh kiwa da sooh thied bha cha tre tangwa i da kreh i yow pyndooh jait ki iwi hadien iwi wei ini i leh ka sorkar katni da sdang yoo wa da mih soh i.
Da klam u leh chaphang wow pynyabi ya waroh ki nongbah ki jylla North East deiwa chna ya ki luti rel wa kynthup ya ka Shillong wei katni naka 900 sien i hær ki lieñsuiñ ha ka chi tayaw ha u 2014 da ku cha 1900 sien. Da ong u wa hapoh ka UDAN Scheme, ki lieñsuiñ da hær ki cha 16 tylli ki thaw hei dor wa toh wei da yoh myntoilang leh ki warep ka Meghalaya wa North East heiwa ya ki jhoor ki jhep, ki soh ki pe da ye wow pynpoi cha waroh ki yaaw ki haat ka ri kamjooh cha baar ri hapoh ka Krishi Udaan Scheme.
Da khana u leh wa ha kini ki 8 snem da pynlut T. 5000 klur yow chna ya ki National Highway ha Meghalaya wei ha kini ki 8 snem ki sarok kiwa chna cha ki thaw wa em cha palatsor wa chna hapoh ka Pradhan Mantri Sadak Yojana ha Meghalaya da man ko 7 chah ya iwa da chna ha ki 20 snem nachwa.
Da khana u leh wa daw pynyieñ 6000 tylli ki Mobile Tower haka thaaiñ North East hei lut wa T. 5000 klur wei kini daw man ki leh kam ki laad yoh kreh ya ki khon khynroo ka Meghalaya. Chooh chooh da kdaw u yei chna ya palat 150 tylli ki Eklavya School ha ka thaaiñ North East heiwa na kini 39 tylli toh kiwa em ha Meghalaya.
U Prime Minister da e khublei Christmas u ya waroh.
Da emlang ha kani ka sngi wa u Chief Minister ka Meghalaya, u Conrad K Sangama, Governor ka Meghalaya, u Brig (Dr.) B D Mishra (Retd), u Union Home Minister, u Amit Shah, ki Union Minister wa kynthup ya u G Kishan Reddy, u Kiren Rijiju wa u Sarbanada Sonowal, u Union Minister of State, u B L Verma, u Chief Minister ka Manipur, u N Biren Singh, u Chief Minister ka Mizoram, u Zoramthanga, u Chief Minister ka Assam, u Himanta Biswa Sarma, u Chief Minister ka Nagaland, u Neiphiu Rio, u Chief Minister ka Sikkim, u Prem Singh Tamang, u Chief Minister ka Arunachal Pradesh, u Pema Khandu wa u Chief Minister ka Tripura, u Manik Saha.
