Ka Rotary Club Jowai hadien i yoh ko ya kiwa kitkaam wa thymme neibynta ka samoi yong u snem 2023-24 kawa man hei yahkhmat u Rtn. Deibormi Toi kam u President wa u Rtn. J.M. Pohsngap kam u Secretary, ha ka sngi Mulong 4 tarik, u Rtn. Nilesh Kumar Agarwal, District Governor RID-3240 da wan u ha Jowai wow yachem ya ki dkhot ka Rotary ha ka yurim wow yaklam yatuklar ya ki kaam ka Rotary katkam ka riti krehkaam yong ka Rotary International.
Ya kani ka yachemlang da pynman ha Infinity Conference Hall, Mooralong heiwa u Rtn. D.F. Majaw (PHF) da man u kam uwa pynlai ya ka yalang namo u Master of Ceremony wei katkam ka dustur yong ka Rotary da kdar yahkhmat dei rwai yei sur ka National Anthem neitæ pynbood i klam pdiang burom da u Rtn. Rudolf E. Laloo (PHF) RC-Jowai, i klam e mysnien na u District Asst. Governor, i khana pynsñiaw yei parom na u Rtn. Nilesh Kumar Agarwal uwa da puræ da u Rtn. Montri Passah, Past President RC-Jowai katwa hei pynkut won da wan u Rtn. J.M.Pohsngap, Secretary Rotary Club Jowai uwa da e u ki kyntien khublei.
U Rtn. Deibormi Toi, President Rotary Club Jowai hawa klam ha kani ka yalang da pynsñiaw u ya ki mat wa ka thong krehkaam yong ka Rotary International kiwa chong pyrkhat sani bha da ki khroo pyrkhat yong ka Rotary International wa kynthup yaka Community Service, Environment, Education, Health, Sanitation wa kiwi kiwi kiwa yatoh wei miat i bha ka imlang sahlang yong ki bru wa chong chnong.
Neiliang ki dkhot ka Rotary Club Jowai heini i yachem da yoh laad ki leh wow yaklam yatuklar ya kiwa boon ki kaam kiwa man ha ka luti ka yurim wow ye u pynmiat pynjanai chooh chooh yei rukom krehkaam ki dkhot ka Rotary Club Jowai katkam ka rukom dutsur yong ka Rotary International.
U Rtn. Nilesh Kumar Agarwal, District Governor, RID-3240 hei klam i kappæ yong oo, dap u dei sñiawngooh sñiaw burom wa khroo ya ka Rotary Club Jowai wei da kyrsu kyntu u leh ya ki dkhot ka Rotary Club Jowai wow em i mynsien yakrehlang wei sñiawtre ya kani ka seiñ khnang yow ye phi u leh chiboon ki kaam neibynta ka imlang sahlang, kiwa ye u man hei dur yong i kyntu kynrong yei puræ puthi, i chait i khiah, i yada pynneh pynsah ya ki soodong sookun ka bei rymaw wa kiwi kiwi.
Discussion about this post