Jowai: Ka sngi wow sahkynmoo hapoh ka Rotary Club Jowai wa ha kani ka Musiang 13 Naiynru i janmiet u Rtn. Dr. D. Das, District Governor, RI District 3240, 2019-20 da wan u ha Jowai wow yachem wa ki dkhot ka Rotary Club Jowai kawa da man ha Infinity Hall, Mooralong.
Ha ka yalang wa chongkun hapyrdi i bood ya ki adong sorkar wow em hei yajngai nawi hawi, u President u Rtn. JM Pohsngap daman u kam u chongknor katwa kiwi ki Rotarian kiwa da embynta ha kani ka yalang toh u Rtn. M. Passah, Secretary Literacy uwa da e ya ki kyntien pdiang burom, u Rtn. S. Laloo uwa da e ya ki kyntien khublei, u Rtn. Rudolf E. Laloo, Secretary Rotary Club Jowai won da yieñ u wow khana pynsñiaw yei lai luti ka seiñ wa ki kaam wa daleh ha ka samoi 2019-20 katwa u Rtn. S.K. Lato, President Elect yieñ u wow khana yei parom wa tbian u District Governor RI District 3240 Rtn. Dr. D. Das.
Ka Rtn. E.F. Gatphoh, Asst. District Governor, Zone X RI District 3240 hei e yei klam da yaroh ko yei man i long u District Governor Rtn. Dr. D. Das heiwa da ong ko wa i wan yong oo e bor e mynsien i ya ka seiñ wa ya ki dkhot waroh neibhah oo toh u bru wa imsngi u pynyoo da ki kaam wei yooluti ko leh neini chakhmat ki kaam ka seiñ u man chooh chooh ki kiwa rap miat rap bha wei em naam em burom dei yakrehlang chirup wei e buit e budia yong oo.
U Rtn. D. Das, District Governor RI District 3240 hawa klam da e mynsien u ya ki para Rotarian waroh deiwa kdaw ya ki kyntien imsngi ka Rotary yong uni u snem iwa ong ‘Rotary Connects the World’ heiwa da ban joor u leh ya waroh wow em ki yeitæ i sñiaw wa yajan nawi hawi.
Chooh chooh leh u District Governor yaroh u ya ki kaam kiwa ka Rotary Club Jowai da leh ko ha ki 25 tylli ki snem wa lai luti ko kiwa man ha ki dur ki rukom waphær kiwa man i myntoi wa khroo ya ka imlang sahlang.
Heini i wan yooh-kjat u District Governor, da synranlang leh ya o da ka kurim yong oo wei da pynchongchit leh ya kani ka janmiet dei sur iwa da rwai da u Deiwitawan Synnah uwi na kiwa chah pynkupburom ha ka Rotary Club Jowai yong u snem 2019-20.
