U Montri ka sorkar pyrdi wa pait ya ka Environment, Forest and Climate Change, u Bhupender Yadav lyngba u Tweeter da pyntip u wa u Chief Minister ka Madhya Pradesh, u Shivraj Singh Chauhan wa u Montri ka sorkar pyrdi wa pait ya ka Civil Aviation, u Jyotiraditya Scindia da pynlait ki ya ar tylli ki khla uwi uwa 4 snem i rta uwa da wanrah na Satpura Tiger Reserve wa kawi ka khla kynthai kawa 3 snem tam i rta kawa da wanrah na Bandhavgarh Tiger Reserve, yow im noh ki ha i thaw wa da chna hapoh ka Madhav National Park, Madhya Pradesh.
Neiliang u Yadav da ong u wa hapoh i pait u Prime Minister Narendra Modi, ka ri India da leh ko chiboon ki kaam wow pynku yei yada ya ki marad khloo wei wow pynchlur leh ya ki kaam uiñke suwari yow pynmyntoi ya kiwa chong chnong.
Ka Madhav National Park, man ko kam kawi na kiwa rim dooh ki National Park ka Madhya Pradesh kawa da pynban ha u snem 1956, wei jooh em ko boon ki khla ha ka nachwa. Tangwa ha kini ki snem wa da lai da sdang duna i em ki khla wei iwa khadooh dooh wa da yoo ya ki toh ha u snem 2012.
Kani ka National Park toh kawa heh 354.61 sq km, wei man ko leh kawa emkaam hei wow yada ya ki mrad khloo neibhah ye wow pynyabi ka waka Panna Tiger Reserve wa em ha Madhya Pradesh deilang waka Ranthambore Tiger Reserve ka Rajasthan.
Kam chibynta ini i thong wow em khla biang ka Madhav National Park, neiliang ka Madhya Pradesh Forest Department da pynkhreh ko wow wanrah 5 tylli ki khla (2 tylli ki chynrang wa 3 tylli ki kynthai) na Bandhavgarh Tiger Reserve wa na Panna Tiger Reserve wa na ki thaw wa em chajan ka Bhopal.
Yow booh ya kini ki khla. da kær kut ya 3 tylli ki thaw kiwa mar 1.3 Hectare kawi wei kini toh kiwa da em leh ka Gate yow lai na kawi cha kawi wei kiwa em boon ki dieñ yow rieh sngi kini ki khla kamjooh leh ka um.
Ya kini ki khla nyngkong daw pait chwa ya ki kammon ye ki wow im heini da kiwa kreh miet wa sngi. Da thung leh ya u Veterinary Doctor, da booh leh ki kari, ki tharu naar, ki suloi wa siat dawai neibynta kini ki khla.
