Ka Synjuk Waheh Shnong Ri Jaiñtia (SWSRJ) da chong dorbar ko ha ka 11 tarik uni u bnai ha Khliehriat West, East Jaiñtia Hills District heiwa da chim ya ki rai yong ka Synjuk ki wow lai ko chakhmat kiwa em 6 tylli ki dawa na ka sorkar.
Kini toh wow thoh cha waroh ki DC ki ar District heiyatoh wa i pynslem yoh Card Ration ki paidbah wei wow booh ya ki dukan namo ki Fair Price Shop hapoh ki chnong ym toh cha kiwi ki chnong iwa da wanrah yei chitom ya ki khynnah kynthai, ki tymmen wow lai thooh khoo cha jngai khamtam ha ki por wa slap.
Daw booddien leh yei slem u wai wei wow pynkrehkaam ya ka Civil Hospital Khliehriat kawa da dep pynku kyrdan na ka CHC cha ka Civil Hospital.
Ka synjuk u pyrchah ko leh yei pyndait wei pynkrehkaam ya u Smart Meter kat wym pu em chwa i pynche paidbah wei khlem da mynjur da ki chnong ki thaw wei kiwa boon chem ki wa chah ktah i lut i sep wow thied wow kylliang ya u Meter.
U dawa leh wow wanrah ya i roi i paar ha ki dong ki chnong nadooh ki skur ki College, u pynbiang umbaam umdih wei wow pynchna smat ya ki sarok ha ka thaaiñ khappood kam u sarok Borkhat, Huroi, Hingaria hadooh Umkiang, Ratacherra wei kamjooh ya u sarok Saipung.
Da dawa leh wow pynku kyrdan ya ka Laskein Block cha ka Civil Sub-Division, u pynkha noh ya ka C&RD Block Namdong neibhah wa ka Thadlaskein Block da em ko boon palat ki chnong.
Ka synjuk da kyrpaad ko leh ya ka sorkar jylla wow wai wei e laad noh ya ki bru wow kreh wei khayi mooyong kawa da chah da ka aiñ wei wow pynlait noh ya ka Chalan khnang wow yoh noh wow khayi kamwa jooh man nachwa.
Da chim leh yei rai wow pynsñiaw cha ka sorkar wa toh u bichaar bniah bha din pa din yow yoh yei mynjur na ki Dorbar Chnong wa em ha khappood ka India wa Bangladesh ha thaaiñ War Jaiñtia wa War East heiyatoh wow kær nar chieh ya u pood.
