U MDC ka Amwi Khliehtyrshi, u Madonbai Rymbai ynne ka sngi da wanrah u ka mat yaklam hapoh ka dorbar mang tangka ka JHADC heiyatoh wa i sahteiñ ki Scheme ka 15th Finance Commission na ka sorkar pyrdi, wei kattu sa du kut noh uni u 2025-2026 yow poi won noh da ka 16th Finance tangwa ym pu ye u pynlai bait wot ya ki warim.
Ong u wa hei sakhiat ym em ware u yoo eh wow pynbait, kamtæ kyntu u ya ka EC wa u CEM wow booddien ki hei rukom wa toh wei heipor wa smat.
Hawa pynche yeini, u Dy. CEM u Lasky Rymbai ong u i eh ymtoh wa maad du ka JHADC tangwa kiwi ki Autonomous District Council haka jylla leh maad ki i jooh hi.
I daw toh wa na ka rukom (System) wa pynlai ka sorkar pyrdi, heiwa nachwa ya ki Scheme ym emkaam u Submit næ pynpsiah hapoh ka Portal eGramSwaraj, tangwa nadooh u 2021 ka sorkar pyrdi da hukum ko wa toh u Upload bait hapoh ka eGramSwaraj.
Heiyatoh wa ini ong u ka sorkar pyrdi da phah ko dei thoh cha ka sorkar jylla wa emkaam u chna ki ya ka Finance Commission Committee hadooh u 2024 lym kamtæ ye u dooh noh ya ki Scheme. Kamtæ ka sorkar jylla leh da chna ko ya katæ ka Committee wei da lai bait ka Scheme hadooh katni.
Hadien neitæ won u Dy. CEM ong u wa mih won da iwi i eh heiwa ya kawon kawon ka Scheme wa tyrwa hap u leh haroh sa ka GeoTag wei lada ym leh, ym ye u sdang yei kaam, heijooh i por hap leh da ka Online Payment.
Hajrong ka Online Payment sñiawkmen u wa da man kawa lai bait.
Yooluti u wa waroh iwa sahteiñ nadooh u 2020 hadooh 2026 u man kiwa lai bait kamwa dadep lai yachem ki wa u Chairman ka 15th Finance Commission, u N.K. Singh uwa da kular leh ya ki wow pynlait noh waroh kiwa sahteiñ, lada pyndep u Submit ya ki Utilisation Certificate.
Pyntip haroh u wa hadien ka 2 tarik u April daw yachong yachem biang ki yow booh Appointment neibynta u lai yachem won wa u Joint Director ka 15th Finance Commission hadien wa dadep Session ha Parliament.
Hadien wa yoh yei pynche neiliang u MB Rymbai leh uwa wanrah ya kani ka mat yaklam da hun u wei da pyndam noh u ya ka Motion yong oo.
Discussion about this post